Babigarutseho ku Cyumweru tariki 15 Ukwakira 2023, ubwo hizizwaga umunsi mpuzamahanga w’umugore wo mu cyaro, aho ibirori byo kuwizihiza byaranzwe no kwishimira iterambere bamaze kugeraho, ndetse no kuremera abandi kugira ngo bibafashe mu iterambere ryabo.

Byagaragaye ko abagore bo mu cyaro benshi bayoboye ingo bagihura n’inzitizi zo kugera ku mazi meza, amashanyarazi ndetse no kutamenya gukoresha ikoranabuhanga, ari kimwe mu byashingiweho hashyirwaho uwo munsi mpuzamahanga, kugira ngo barusheho kwiteza imbere.

Bamwe mu baganiriye na Kigali Today bayitangarije ko abagore bari abo gusigara mu rugo, nta kindi bashobora kwikorera uretse kurebana n’imirimo yo mu rugo, ibintu byabadindizaga mu iterambere, ugereranyije n’uyu munsi aho nta murimo bahejwemo.

Rosette Mkampabuka wo mu Murenge wa Nyamata n’umubyeyi w’abana batatu, avuga ko bishimira ko bajijutse bagatinyuka bagashaka imibereho ku buryo batunga imiryango yabo.

Ati “Nkanjye ndi umucuruzi mbasha kurangura nibereye iwanjye nkoresheje itumanaho ibicuruzwa bikangeraho ntiriwe mvuga nti ndafunze ngiye kurangura. Umugore wo mu cyaro yarajijutse ndabihamya, kuko cyera baritinyaga cyane, bagatinya no kujya ahantu, ugasanga ntibakaraba ariko ubu abagore bose dusigaye dusa neza.”

Beatrice Musabyimana avuga kujijuka byabafashije kujya mu bimina ku buryo byabafashije mu iterambere ryabo.

Ati “Umugore wo mu cyaro yarajijutse, n’urubyiruko ubona ko rurimo kugenda rugenda rudukurikiza bitewe n’uko niba abona icyo kimina mama we arimo, nabo twagiye tubaha agasanduku mu rugo yagira igiceri asagura akakinagamo. Nko ku munsi mukuru iyo wageze hari byinshi uba usabwa kugira ngo ukorere umwana, ahita amena ka gasanduku akakubwira ati dore amafaranga maze kugeraho, turashaka kuyakoresha ikintu runaka, ubu na telefone turazikoresha icyo tutarabasha kugeraho mu rugo ni computer.”

Komiseri w’imibereho myiza mu rwego rw’Inama y’Igihugu y’abagore mu Karere ka Bugesera, Marcelline Mukandamage, avuga ko kuba iterambere ry’Igihugu riva mu ngo, Leta yafashe ingamba nyinshi zitandukanye zo kugira ngo umugore afashwe kurushaho kwiteza imbere.

Ati “Yashyizeho gahunda yo gukora ubukangurambag,a kugira ngo abagore bose bo mu cyaro bagane amatsinda y’ubwizigame magirirane kandi dukoresha ikoranabuhanga, tuyoboke amabanki, dukorane n’ibigo by’imari, bige imyuga kugira ngo umugore wo mu cyaro yiteze imbere, bityo n’Igihugu cyacu cyiteze imbere. Iterambere ry’Igihugu burya riva mu ngo zacu, ingo nizidatera imbere n’Igihugu cyacu ntabwo kizatera imbere.”

Umunsi mpuzamahanga w’umugore wo mu cyaro ku rwego rw’Igihugu wizihirijwe mu Murenge wa Rubaya mu Karere ka Gicumbi, ukaba wari ufite insanganyamatsiko igira iti “Dushyigikire iterambere ry’umugore wo mu cyaro.”

Ni umunsi washyizweho mu 1995 mu nama mpuzamahanga y’abagore yabereye i Beijing mu Bushinwa, hagamijwe guteza imbere umugore wo mu cyaro, ukaba wizihizwaga ku nshuro ya 26 mu Rwanda, kuko watangiye kwizihizwa mu 1997.