Batanu bari bafungiye muri Uganda bavuga ko bakorewe iyicarubozo

Saa mbiri z’ijoro ku Cyumweru tariki ya 07 Werurwe 2021, nibwo ku mupaka wa Kagitumba hagejejwe abanyarwanda batanu bari bafungiye muri Uganda, bakavuga ko bakorerwaga iyicarubozo aho bari bafungiye muri CMI.

Bahamya ko bose bakorewe iyicarubozo
Bahamya ko bose bakorewe iyicarubozo

Uko ari batanu bafashwe mu bihe bitandukanye ndetse no mu bice bitandukanye mu gihugu cya Uganda.

Uwitwa Rukundo David w’imyaka 25 wo mu karere ka Nyagatare, avuga ko yavuye mu Rwanda anyura muri Uganda yerekeza muri Kenya muri Mutarama 2020.

Icyo gihe yahise afatirwa ahitwa Busia ku mupaka uhuza Uganda na Kenya ari naho yavaga agarutse muri Uganda.

Abashinzwe umutekano ba Uganda ngo bamusabye ruswa y’amafaranga kugira ngo bamurekure abyanze bamumarana iminsi itanu mbere yo kumushyikiriza Urwego rw’Ubutasi mu ngabo za Uganda (CMI), ajyanwa muri gereza ya Mbuya aho urwo rwego rufungira.

Avuga ko yashinjwe kuba maneko w’u Rwanda no kwinjira muri Uganda mu buryo bunyuranyije n’amategeko.

Hirwa Tresor ukomoka mu Karere ka Gasabo avuga ko yagiye muri Uganda mu mwaka wa 2017 anyuze ku mupaka wa Cyanika yerekeza i Kampala, aho yakoreraga ubucuruzi bw’inkweto n’imyenda.

Yafashwe na CMI tariki 22 Nzeri 2020, ashinjwa kuba muri Uganda mu buryo bunyuranyije n’amategeko.

Avuga ko igihe cyose yamazeyo yakubitwaga igitondo n’ikigoroba ndetse ngo agahabwa ibiryo bidakwiye umuntu.

Ati “Nagira inama n’abandi kudahirahira bajya Uganda kuko ni mu rupfu, narakubitwaga igitondo, amanywa n’ijoro. Kurya ni ukuguha akawunga kaboze n’amamiminwa n’ibishyimbo”.

Yongeraho ko ari ibyo yacuruzaga ndetse n’amafaranga yari amaze gukuramo nta na kimwe agarukanye ahubwo byose yabyambuwe.

Uwitwa Patrick Rugema ukomoka mu Karere ka Muhanga avuga ko mu Kuboza 2019 yagiye muri Kenya anyuze Tanzaniya agiye gusura umuvandimwe we.

Yafashwe muri Nzeli 2020 i Busia ku mupaka uhuza Kenya na Uganda, yafashwe n’inzego z’umutekano za Uganda ashinjwa kuba maneko ariko nyuma y’iminsi itanu aza kurekurwa ngo atahe ariko na none yongera gufatwa uwo munsi utararenga.

Agifatwa ngo yajyanywe gufungirwa ahitwa Makenke mu kigo cya gisirikare kiri i Mbarara ariko aza koherezwa i Mbuya muri CMI, nabwo ashinjwa kuba maneko w’u Rwanda.

Abo batanu bagejejwe ku mupaka wa Kagitumba baje bakurikira abandi batandatu bahagejejwe ku itariki 03 Gashyantare 2021 barimo umugore wagaragazaga ibimenyetso by’iyicarubozo dore ko atanabashaga kwigenza, uyu akaba yaranateshejwe umwana w’umwaka n’igice, akigera mu Rwanda yahise ajya kuvurirwa mu bitaro bya gisirikare i Kanombe.

Uko ari batanu bageze mu Rwanda mu ijoro ryo ku cyumweru tariki ya 07 Werurwe 2021, bahuriza ku kuba barambuwe imitungo yabo harimo n’amafaranga.

Shakisha izindi nkuru
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka