Bosenibamwe yasimbuwe ku buyobozi bwa FPR-Inkotanyi
Guverineri w’Intara y’amajyaruguru, Musabyimana Jean Claude niwe muyobozi mushya w’umuryango FPR-Inkotanyi muri iyo ntara, asimbuye Bosenibamwe Aimé wayiyoboraga.
Guverineri Musabyimana yatorewe uwo mwanya binyuze mu matora yakozwe n’inteko rusange idasanzwe y’umuryango wa FPR-Inkotanyi ku rwego rw’Intara y’Amajyaruguru, yateranye tariki ya 06 Ugushyingo 2016.
Guverineri Musabyimana yagize amajwi 98%. Umwali Juliette bari bahanganye yagize amajwi 2%. Abanyamuryango 347 nibo bari bagize inteko itora.
Bosenibamwe yahise atanga imfunguzo n’ibitabo bikubiyemo ibyakozwe n’ibiteganyijwe gukorwa ku rwego rw’umuryango FPR-Inkotanyi mu Ntara y’Amajyaruguru.
Yifurije Guverineri Musabyimana kuzagira imirimo myiza akaba ari nayo imuranga.
Agira ati “Aho umuryango muwusanze ni heza ariko muzarusheho guteza imbere ibikorwa byawo naho ibyakozwe ariko bikaba bigikomeza bizasozwe neza ndetse byongerwe.”
Guverineri Musabyimana yashimiye abanyamuryango bamugiriye icyizere bakamutora abasezeranya ko yiteguye gukomeza gufatanya nabo nk’uko yabitojwe.
Agira ati “Inkoni y’ubushumba nahawe ni ikimenyetso gikomeye nzifashisha mu kuyobora ndetse nkanayifashisha mu gukebura abazakosa”.
Undi watowe muri komite y’umuryango FPR-Inkotanyi mu Ntara y’Amajyaruguru ni uwungirije perezida w’umuryango ariwe Muhizi Jules Aimable.
Yagize amajwi 90% atsinze Sisi Jean Damascène wagize amajwi 10% by’inteko yatoye igizwe n’abanyamuryango 347.
Abanyamuryango ba FPR-Inkotanyi bavuga ko muri iyo Ntara ibikorwa 30 byari biteganyijwe gukorwa muri byo 18 byarangiye mu buryo bwa burundu n’ibisigaye bikaba biri hafi kurangira.
Gasamagera Wellars, Komiseri mu muryango wa RPF-Inkotanyi yibukije abanyamuryango ko bakwiye guharanira inyungu rusange bakegera abaturage.
Ibitekerezo
Ohereza igitekerezo
|