Amajyaruguru: Abadepite bakiriye ibibazo by’abaturage nyuma yo gukorana umuganda rusange

Perezida w’Inteko Ishinga Amategeko Umutwe w’Abadepite, Hon. Mukabalisa Donatille, yakoranye umuganda n’abaturage bo mu Kagari ka Kivumu mu Murenge wa Nemba mu Karere ka Burera, baboneraho n’umwanya wo kumugezaho ibibazo bitakemuwe n’inzego z’ibanze.

Hon Mukabalisa yafatanyije n
Hon Mukabalisa yafatanyije n’abandi bayobozi gucukura imirwanyasuri

Hari mu muganda rusange usoza ukwezi kwa Werurwe 2022, ku rwego rw’Intara y’Amajyaruguru ukaba wakorewe mu Murenge wa Nemba mu Karere ka Burera.

Hon. Mukabalisa wari uherekejwe n’abayobozi barimo Guverineri w’Amajyaruguru, Nyirarugero Dancille, Itsinda ry’Abadepite bari mu butumwa bw’akazi muri iyo Ntara, inzego z’umutekano n’ubuyobozi bw’Akarere ka Burera, bakiriye ibibazo by’abaturage kugeza ubwo igihe cyababanye gito, bahagarika ibibazo hakiri abaturage benshi bashaka kubaza.

Umuganda rusange ugarutse nyuma y’igihe kigera ku myaka ibiri yari ishize warabangamiwe na COVID-19, bituma abaturage batabona uburyo bwo kubaza ibibazo byabo no guhabwa ibisubizo, kungurana ibitekerezo ndetse no kuganira n’abayobozi babo mu ruhame nk’uko byakorwaga nyuma y’umuganda.

Umuganda wibanze ku bikorwa byo kurwanya no guhangana n’ibiza, hacukurwa imirwanyasuri no kuyiteraho ibyatsi bifata ubutaka ku musozi wa Rwankuba, uherereye mu Mudugudu wa Mugano, Akagari ka Kivumu mu Murenge wa Nemba, mu rwego rwo kurwanya isuri imaze iminsi yibasiye uwo musozi.

Nyuma y’umuganda, ubwo Depite Mukabalisa Germaine, Depite Uwamariya Veneranda na Depite Murara Jean Damascene bari mu ruzinduko rw’iminsi 13 mu Karere ka Burera bagaragazaga bimwe mu bibazo bamaze iminsi babona muri ako karere, Perezida w’Inteko ishinga amategeko umutwe w’Abadepite, Mukabalisa Donatille, yahaye ijambo abaturage ngo babyivugire.

Abaturage babajije ibibazo harimo ibyo bavuga ko byari byarirengagijwe
Abaturage babajije ibibazo harimo ibyo bavuga ko byari byarirengagijwe

Mu baturage bitabiriye umuganda bagera muri 800, hafi ya bose bagaragaje inyota yo gutanga ibibazo. Abenshi mu bahawe umwanya bagaragaza ibibazo birimo ibisaba ubuvugizi mu nzego nkuru z’Igihugu, ariko hagaragara n’ibibazo byinshi byakagombye gukemukira ku rwego rw’imirenge n’utugari.

Ibibazo byinshi babajije birimo ibijyanye n’akarengane bakorerwa ubuyobozi bubegereye bukabyirengagiza, ihohoterwa mu miryango cyane cyane abangavu, kutagira ibikorwa remezo birimo kutagira uburyo bw’itumanaho bwa telefoni budakora muri ako gace, basaba kubakirwa umunara, abandi bavuga ko bakeneye amazi hafi yabo, amashanyarazi, imihanda, amashuri y’imyuga n’ibindi, hagaragara n’abandi bangirijwe imitungo ntibahabwa ingurane.

Umwe muri bo baturage witwa Ntacyibuka Winifride, yagize ati “Mfite umwana wahohotewe abyara umwana na we ubwe ari umwana, babigejeje mu buyobozi bafata uwahohoteye umwana wanjye, ariko nyuma ntungurwa no kubona bamufunguye, ubu aridegembya”.

Uwitwa Nyirandibori Albertine, Ati “Nagize ikibazo cy’impanuka mu gihe cy’intambara ndi umwana muto, ubu mfite ubumuga bukomeye bananshyizemo ‘tige’. Nta kintu nshobora kwikorera, ariko byarangiye ubuyobozi bunshyize mu cyiciro cya gatatu mbura amahirwe yo kwishyurirwa mituweli, ubu ndarwara nkarembera mu rugo”.

Hari n’abangirijwe imitungo batwarwa n’amasambu yabo yubakwamo ibikorwa remezo, babarirwa ingurane ariko ntibayihabwa, aho yagendaga ihabwa bamwe abandi bakabashyira ku cyizere bakaba bamaze imyaka irenga itatu bategereje kwishyurwa, aho bemeza ko bidindiza iterambere ryabo.

Hari n’abagaragaye bavuga ko ibyangombwa byabo by’ubutaka byarigishijwe n’umukozi wa banki, nyuma y’uko bari babitanze ubwo bari bijejwe inguzanyo aho umushinga wabo wari watoranyijwe mu yatsinze, ariko ngo birangira umukozi wa banki atorokanye ibyangombwa byabo ndetse n’inguzanyo ntibayihabwa.

Perezida w’Inteko Ishinga Amatekeko y’u Rwanda Umutwe w’Abadepite, yasabye abadepite bari mu ruzinduko mu Karere ka Burera kubikurikirana bakazarangiza urwo ruzinduko bazi uko byakemutse, ibindi bibazo bikomeye avuga ko bazabinyuza mu nteko rusange y’Abadepite, bigashakirwa uburyo byakemuka abaturage bakarenganurwa.

Hon. Mukabalisa Donatille
Hon. Mukabalisa Donatille

Hon. Mukabalisa yasabye abayobozi kwegera abaturage bakabafasha gushaka ibisubizo ku bibazo by’amakimbirane byakomeje kugaragara, avuga ko kubera ibyo bibazo byose ari yo mpamvu Abadepite bose bari mu ruzinduko mu turere tw’igihugu, basura abaturage urugo ku rundi bumva ibibazo byabo.

Depite Mukabalisa kandi yasabye ubuyobozi mu nzego z’ibanze, kurushaho kwegera abaturage, kubumva no kubakemura ibibazo. Ati “Birumvikana ko muri iki gihe cya COVID-19 inteko z’abaturage n’imigoroba y’ababyeyi itateranaga, ariko hari gahunda nyinshi nziza Leta yashyizeho, abantu bagiye bazitabira ndetse n’abayobozi bakaba hafi abo bayobora ibibazo byakemuka”.

Bishimiye ko umuganda wasubukuwe, bawitabira ari benshi
Bishimiye ko umuganda wasubukuwe, bawitabira ari benshi

Abaturage b’Umurenge wa Nemba kandi basabwe, kwitabira gufata urukingo rwa COVID-19 inshuro zose, kwitegura neza icyumweru cyo Kwibuka ku nshuro ya 28 Jenoside yakorewe Abatutsi, kwitabira gutanga mituweli no guhangana n’ibiza, bitabira kubungabunga ubutaka, bazirika n’ibisenge by’inzu zabo.

Nyuma yo kwifatanya n’Abaturage mu muganda wabereye mu Kagari ka Kivumu no kwakira ibibazo n’ibitekerezo by’abaturage, Perezida w’Inteko Ishinga Amategeko Umutwe w’Abadepite Mukabalisa Donatille, yakomereje uruzinduko mu Kagari ka Nyamugari aho yayoboye igikorwa cyo gutanga umuriro w’amashanyarazi ku ngo 40 zihatuye.

Hon. Mukabalisa yayoboye igikorwa cyo gutanga umuriro w
Hon. Mukabalisa yayoboye igikorwa cyo gutanga umuriro w’amashanyarazi ku batuye mu Kagari ka Nyamugari
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka