Perezida Kagame yagize ati “Tuzi icyo dushaka, niba tuzi neza aho dushaka kugana ndetse n’icyo bisaba ngo tugereyo, kuki byatugora? Icyo bisaba ni ukubyitwaramo neza.” U Rwanda rwihaye intego ko mu myaka itanu iri imbere ubukungu bw’u Rwanda buzazamuka ku kigero cya 11,5%.

Ku munsi wa nyuma w’umwiherero w’abayobozi waberaga i Gabiro ho mu Murenge wa Kabarore mu Karere ka Gatsibo, hibanzwe ku bikorwaremezo, kongera ubushobozi bw’abakozi ndetse no kurushaho kunoza itangwa rya serivisi mu nzego za Leta.

Ku birebana n’inzitizi u Rwanda rukomeza guhura na zo, Perezida Kagame yabwiye abayobozi ko bakwiye kuzifata nka kimwe mu bibatera imbaraga kugirango bagere no ku birenzeho.

Aha yasobanuye ko akarengane hari ibyo kibutsa ugakorerwa, aho yagize ati: “Gatuma uhora uri maso kakanagutera imbaraga zo kwitanga uko bishoboka.”

Ibikorwaremezo, imwe mu nkingi z’iterambere ry’ubukungu, ni kimwe mu bizashyirwamo imbaraga nyinshi muri gahunda y’imbaturabukungu icyiciro cya kabiri (EDPRS 2).

Minisitiri w’Ibikorwaremezo, Prof. Silas Lwakabamba, yagejeje ku bitabiriye uyu mwiherero bimwe mu bizashyirwamo imbaraga mu myaka itanu iri imbere birimo kuvugurura imijyi, gutunganya uduce duherereye kure y’imijyi, ingufu n’ubwikorezi.

Minisitiri Lwakabamba yasobanuye ko EDPRS 2 ikubiyemo na gahunda yo guteza imbere imijyi iciriritse hose mu gihugu, hatezwa imbere imiturire ariko hashyirwa n’imbaraga nyinshi mu bikorwaremezo byo mu duce tw’imijyi dukomeje kugira ubwiyongere bw’abaturage badutuyemo.

Yanagaragaje kandi ko ubwikorezi ari kwimwe mu bifasha guteza imbere ibikorwaremezo, bityo avuga ko indege ya cargo ari kimwe mu byo EDPRS 2 iteganya kugeraho.

Mu bindi EDPRS 2 izibandaho harimo n’uburezi, hashyirwa imbere kwigisha imyuga. Aha Minisitiri w’Uburezi Vincent Biruta yagarutse ku birebana n’uko hakenewe guhindura imitekerereze ya bamwe mu rubyiruko bafata kwiga imyuga nkaho nta gaciro bifite.

Minisitiri Biruta yagize ati “Urubyiruko rukwiye kumenya ko uburezi atari ukugira za dipolome. Kwiga imyuga ni kimwe mu bizatuma ibyiyemeje kugerwaho muri EDPRS 2 bishoboka.”

Minisitiri w’ububanyi n’amahanga akaba n’Umuvugizi wa Leta, Louise Mushikiwabo, yatanze ikiganiro ku kuba u Rwanda rukeneye kwivugira ibyo rukora n’ibiruberamo, bityo rukaba ari rwo rugaragaza isura yarwo nyayo mu ruhando mpuzamahanga aho gukomeza kugendera ku bivugwa n’abanyamahanga, kenshi biba bitarimo ukuri.

Perezida Kagame yatanze urugero rwa zimwe muri raporo zo ku rwego mpuzamahanga zigaragazwa nk’izihariye ibirebana no kugaragaza icyo uburenganzira bw’ikiremwamuntu ari cyo.

Kagame yagize ati: “Uburenganzira bw’Ikiremwamuntu ni uburenganzira bwacu twese tugihumeka, ntabwo ari uburenganzira abantu bakwiye kumenya kuko bwigishijwe n’agatsiko k’abantu runaka b’ahandi. Ibirebana n’uburenganzira bw’ikiremwamuntu bisigaye byarahindutse politiki.”

Uyu mwiherero waberaga mu kigo cya Gisirikare cya Gabiro mu Karere ka Gatsibo guhera tariki 28-30/03/2013 wari ufite insanganyamatsiko igira iti “ Dukorere hamwe tugamije kugera kuri gahunda y’imbaturabukungu icyiciro cya kabiri”.

Benjamin Nyandwi