Iyo nka yazanywe n’Abarundi inyujijwe mu ruzi rw’Akanyaru, nyuma y’uko u Burundi bwari bwifuje kuyishyikiriza Abanyarwanda inyujijwe ku mupaka wa Nemba mu Karere ka Bugesera, ariko mu Rwanda bagasanga kuyigeza i Gisagara byatwara amafaranga aruta ay’agaciro k’inka, nk’uko bivugwa n’Umuyobozi w’Akarere ka Gisagara, Jérôme Rutaburingoga.

Agira ati "Iyi nka yagarutse bishingiye ku nama ubuyobozi bw’Intara ya Kirundo na Komine Ntega mu Burundi bagiranye na ba Guverineri b’Intara y’Amajyepfo n’iy’Iburasirazuba. Hari hashize umwaka babyemeye, ariko yari itaraza kubera ibibazo bya Covid-19, ariko no kumvikana aho yagombaga kunyura."

Akomeza agira ati "Twe twifuzaga ko yanyura aho yanyujijwe bayitwara kuko kuyizengurukana Nemba byari gutwara ubushobozi burenze agaciro k’inka."

Musitanteri wa Komine Ntega mu Burundi, Pierre Claver Mbanzabugabo, avugira hakurya y’uruzi rw’Akanyaru, yavuze ko hari hashize umwaka iyi nka ifatanywe abari bayibye, iba iragijwe.

Yagize ati "Abajura barayibye bayishikanye iwacu tugira amakenga, turatohoza dusanga mu by’ukuri yaribwe. Yari yamaze no kugurishwa kugira ngo ishorwe mu masoko ya kure. Tumaze kuyifata uwari yayiguze yaciye asubizwa amafaranga, umujura na we ubutungane buramukurikirana."

Aba bayobozi bombi biyemeje gukomeza gufatanya mu kurinda umutekano w’imipaka yombi, bakanafashanya mu kurwanya forode.

Tharcisse Nzasengimana w’i Nyabitare mu Murenge wa Gishubi mu Karere ka Gisagara, ari na we wari wibwe inka, yishimiye kongera kuyibona, n’ubwo yibwe ihaka habura ibyumweru bibiri gusa ngo ibyare, ikaba yagarutse itari kumwe n’iyayo.

Yagize ati "Ndashimira Leta yacu kuko twababwiye iby’inka yanjye yibwe tukayumva yabirira hakurya mu Burundi, na bo bakabigeza ku b’Abarundi, none bakaba bayinzaniye. Umubano w’u Rwanda n’u Burundi uzakomeze usagambe ibihe byose."

Umuyobozi w’Akarere ka Gisagara avuga ko hari n’indi nka yibwe ikambutswa i Burundi itaragaruzwa, ariko yo ngo iri muri Komine Bugabira.