Ako gahimbazamusyi bita PBF kahagaritswe muri Mutarama uyu mwaka, kandi nta kanunu ko kazigera gasubizwaho. Bamwe mu bakozi babwiye Kigalitoday ko bamaze amezi menshi batabona iyo PBF kandi abanyamakosa nyabo barimuriwe mu bitaro bahabwamo ako gahimbazamusyi.

Tariki 12/01/2012, Minisitiri Agnes Binagwaho ushinzwe ubuzima mu Rwanda yasuye ibitaro bya Rwamagana, ahasanga ibibazo birimo umwanda ukabije. Mu nyandiko minisitiri yanditse amaze gusura ibyo bitaro, yavugaga ko ibibazo by’ingutu byagaragaye ari bibiri: “Umwanda ukabije ugaragara mu bitaro hose cyane cyane muri serivise z’ibagiro ndetse n’iyita ku bana bavukanye ibibazo no kutagira ubushobozi mu kuyobora (...).”

Mu myazuro yafashwe icyo gihe, harimo guhagarika uwayoboraga ibitaro icyo gihe, muganga Jean Claude Ndagijimana waje kwimurirwa ku bitaro bya Masaka mu Mujyi wa Kigali n’uwari umuyobozi (administrateur) Mushonda Gervais wimuriwe ku bitaro bya Muhororo.

Undi mwanzuro ni uko “ibitaro by’Akarere ka Rwamagana bitazabona agahimbazamusyi bigenerwa kugera umunsi ibibazo bitandukanye byagaragaye muri urwo rugendo bikemutse.”

Abakozi barabibonamo akarengane...

Abakozi bamwe baravuga ko ibi bihano birimo akarengane ku buryo bubiri. Bagira bati “Minisitiri Binagwaho yirukanye abayobozi kuko aribo yari yabonye barateje amakosa, ariko ibihano bifatirwa abasigaye ndetse n’umuyobozi mushya washyizweho ngo abikosore. Muganga Uwariraye Parfait ubu ari mu badahabwa agahimbazamusyi kandi ikibazo cy’isuku mu bitaro cyamaze gukemuka. Byongeye kandi abo birukanywe hano, minisitiri yabahaye akazi ahandi bahabwa agahimbazamusyi. Ako se si akarengane koko!”.

Abandi bakozi bo bavugaga ko no kuba ibyo bihano bitarakurwaho kandi ibibazo bibiri byabiteje babona byarakemutse hari indi mpamvu ibiri inyuma. Aba bavuga ko ikibazo cy’ubuyobozi cyitahanirwa abakozi, cyabazwa minisiteri itabagenzura ngo ishyireho abayobozi beza.

Byongeye kandi ngo umuyobozi mushya wasimbuye uwakoraga amakosa akwiye kuba yarayakosoye ku buryo n’ibihano byayo byakabaye byarakuweho.

“Isuku yarakemutse, ubanza baratwishyizemo gusa...”

Umukozi utashatse ko amazina ye atangazwa yabwiye Kigalitoday ko ikibazo cy’isuku nke mu bitaro bya Rwamagana cyamaze gukemuka, ahubwo ubu ngo minisitiri yahise avuga ko ngo azongera gusuzuma ibibazo bya Rwamagana bamaze kubaka ubwiherero bushya kandi butari bwavuzwe mu ibaruwa yafataga ibihano yo muri Mutarama 2012.

Uyu mukozi akomeza avuga ko hari ibindi bitaro minisitiri yasuye akavuga ko bakwiye kongera umubare w’ubwiherero ariko akaba atarigeze abahagarikira agahimbazamusyi. Ati “Ibibazo yasanze hano bimwe yarabikemuye aduha umuyobozi ushoboye, iby’isuku nabyo byarakemutse, ubanza ahubwo baratwishyizemo gusa!”

Administrateur w’ibitaro bya Rwamagana, Laurent Musengama yabwiye Kigalitoday ko abona ikibazo cy’isuku mu bitaro cyaramaze gukosoka, ariko avuga ko abashinzwe kugenzura aribo bahamya neza ko ibipimo bikenewe byagezweho.

Kigalitoday yabajije umukozi ushinzwe itangazamakuru muri minisiteri y’ubuzima imiterere y’icyo kibazo, avuga ko ibirebana n’ibitaro bya Rwamagana bishinzwe umuvugizi w’Ikigo RBC, Rwanda Biomedical Center, gishinzwe kumenyekanisha ibikorwa by’ubuvuzi mu Rwanda.

Umuvugizi wa RBC, Arthur Asiimwe yagaragaje ko adashaka kugira icyo avuga kuri icyo kibazo ku nshuro enye zose abanyamakuru ba Kigalitoday bamuhamagaye.

Bamwe mu bakozi bahangayikishijwe n’agahimbazamusyi baravuga ko basabye imyenda muri banki bagihembwa amafaranga menshi arimo n’agahimbazamusyi, biyemeza kujya bishyura menshi ariko ubu batangiye kunanirwa kwishyura kuko banki zibakuraho amafaranga bavuganye, kandi bo batakiyabona kandi nta n’igihe bakeka ko azatangwa.

Undi mukozi avuga ko agahimbazamusyi ari gahunda yashyizweho na minisiteri y’ubuzima, hagamijwe guhimbaza ababa bakora neza. I Rwamagana rero ngo bashobora kudohoka mu kwakira abarwayi neza kuko bumva ko bari kurenganywa.

Ahishakiye Jean d’Amour