Imodoka zishyirwa mu majwi cyane ni izizwi ku izina rya Express ubundi zigomba guhagurukira ku masaha kandi ntizigende zihagarara mu nzira zishaka abagenzi.

Izo modoka ngo zizwiho kudahagurukira ku masaha ziba zahaye abagenzi ku buryo urugendo ubundi imodoka ikora mu isaha imwe hari izirenzaho iminota irenga 30.

Ikibabaza kurusha ibindi ngo nuko izo modoka zitwara aba convoyeurs benshi kandi zikagenda zihagarara inzira zose zishyiramo abagenzi akenshi bakunze kuba bafite imitwaro; nk’uko bamwe mu bagenzi twaganiriye babidutangarije.

Sibomana Isai, umwe mu bagenzi twasanze aho wakwita muri gare ya Ngororero nubwo ari mu muhanda, yavuze ko yari afitanye gahunda n’umuntu bari kujyana i Rubavu ariko atinzwa n’imodoka ya sosiyete yitwa African Tours yamutindijeho iminota 30.

Bamwe basanga ayo masosiyete arimo n’iyitwa International na Sotra Tours akwiye kwamburwa izina akoreraho rya express cyangwa agakurikiranwa kuko atubahiriza ibyo aba yumvikanye n’abagenzi.

Gusa abo twavuganye ntibazi ko bashobora guhamagara muri RURA ngo babagezeho ibibazo byabo dore ko ngo hari n’imodoka zimwe na zimwe zitarimo nomero za RURA kandi ari itegeko kuzishyiramo.

Ernest Kalinganire