Babisabiwe mu muhango wabereye i Kigali ku wa 01 Mata 2022, wo gutanga impamyabushobozi ku nshuro ya mbere ku rubyiruko 68, rwahize abandi mu mpano zitandukanye ku rwego rw’igihugu.

ArtRwanda Ubuhanzi yatangiye mu Gushyingo 2018, yitabirwa n’urubyiruko 2400, hatoranywamo 587 bagaragaje ubushobozi n’ububasha mu mpano zitandukanye bagaragaje, nabo bongera gutoranywamo 68 bashyizwe mu byiciro 6 bitandukanye birimo, Umuziki n’Imbyino (Music & Dance), Imideri (Fashion), Ubuhanzi n’Ikinamico (Art & Drama), Gufotora na Sinema (Photography & Cinematography), hamwe n’Ubuvanganzo (Literature).

Nyuma yo gutoranywa, 68 baje kujyanwa mu mwiherero, aho basabwe gukoresha igihe, ibyiciro bitatu byahize ibindi bihabwa Miliyoni 10 z’Amafaranga y’u Rwanda, mu gihe muri ibyo byiciro uwagiye atsinda kurusha abandi yahawe Miliyoni 1 y’Amafaranga y’u Rwanda.

Minisitiri w’Urubyiruko n’Umuco, Rosemary Mbabazi witabiriye uwo muhango, yabashimiye uburyo bitwaye kuko no mu bihe byari bikomeye bya Covid-19, bakomeje ibikorwa byabo byo guhanga, anababwira ko uwahawe byinshi asabwa byinshi, ari na ho yahereye abasaba kuzarushaho guhanga ibihangano bigaragaza umuco mu ruhando mpuzamahanga.

Yagize Ati “Ikindi tubasaba ni ugukomeza za ndangagaciro ziranga Abanyarwanda, niba ugiye guhanga uzahange iby’iwacu, ubigaragaze mu ruhando mpuzamahanga, na mugenzi wanjye hano yahoze avuga ati rwose tuzabafungurira amarembo muze mucururize n’iwacu, ibyo byose birashoboka. Ahari politiki nziza birashoboka, igihugu umunsi ku wundi baba batekereza uko twakemura ibibazo biri muri muri uru rwego rw’indangamuco, ariko mu bufatanye no mu bushake byose birashoboka”.

Abahawe impamyabushobozi bavuga ko kujya muri ArtRwanda, byabafashije kumenya uko bazamura impano zabo kuko mbere babikoraga mu buryo butari ubwa kinyamwuga, bityo bagasanga ibyo bungukiyemo hari byinshi bigiye kurushaho kubafasha mu kwiteza imbere.

Nadine Kanyana ni umuhanzi w’imideri umwe mu bari muri ArtRwanda, avuga ko mbere y’uko ajyamo yabikoraga nko kwishimisha, kubera ko nta bumenyi buhagije yari afite ku bijyanye no kubyaza umusaruro impano ye.

Ati “Twagize igihe kinini cyo guhura n’abantu baduhugura bidatandukanye kandi twatangiye gukoresha ubwo bumenyi twahawe. Ubu biratubyarira umusaruro, ni umwanya mwiza wo gukoresha ubumenyi nahawe, nkanereka ArtRwanda ko ubumenyi baduhaye ari ingirakamaro, kandi ko tuzabukoresha neza bikaduteza imbere kurenza aho tugeze ubu”.

Umuyobozi Mukuru wungirije wa Imbuto Foundation, nka bamwe mu baterankunga bakomeye ba ArtRwanda, Geraldine Umutesi, yabwiye abahanzi ko babazirikana nk’imfura za ArtRwanda, kandi ko nabo bibaha umukoro wo kwibaza ibyo basize, basigiye abandi bazanyura mu rugendo nk’urwo bamazemo iminsi rwiswe ‘urugendo rwo kwagura impano’.

Ati “Uko mukomeza kwagura impano n’ibikorwa byanyu, muzakomere ku mahame n’indangagaciro mwatojwe, bibabere impamba ihora ibafasha guharanira kugera ku byiza birushijeho iby’ejo hashize, mukabiharanira nkamwe ubwanyu, imiryango yanyu n’igihugu muri rusange”.

Yakomeje agira ati “Turifuza ko uyu munsi utaba uw’ibirori gusa, ahubwo umwanya tumarana wiyongera ku gihe mu maze muri uru rugendo rwo kwagura impano, ibabere ihame ko ibyiza biri imbere, ariko imbere haraharanirwa. Munyemerere rero mukomereze aho, mutere ibindi biti, mwere izindi mbuto nk’uko mwagabiwe ineza namwe mugabe ineza”.

Mu bahawe impamyabushobozi harimo urubyiruko rutandukanye rw’abasore n’inkumi bamaze iminsi bagaragara mu bikorwa bitandukanye by’imyidagaduro na Sinema, aho ibihangano byabo bikundwa n’abatari bacye.