Minisitiri w’Urubyiruko n’Ikoranabuhanga, Jean Philbert Nsengimana, Marry Baine, umunyamabanga uhoraho muri Minisiteri y’Ububanyi n’amahanga (MINAFET) na Jean Baptise Habyarimana, umunyamabanga mukuru wa Komisiyo y’Igihugu ushinzwe ubumwe n’ubwiyunge, nibo bari bitabiriye ibi biganiro byabaye kuri uyu wa Mbere tariki 9/12/2013.

Minisitiri Nsengimana yavuze ko “Ndi Umunyarwanda” itagamije gukangurira Abahutu gusaba imbabazi, ahubwo igamije gusaba Umunyarwanda wese ufite icyo yikeka kubohoka ariko ugasanga Abahutu aribo benshi basaba imbabazi kuko Jenoside yakozwe mu izina ryabo.

Yatanze urugero ati “Hari n’uwavugaga ngo njyewe, mu buhamya batangaga ati icyo kintu cyonyine cyari gihagije (kuba Umuhutu) ko n’ubwo nta Jenoside nakoze ariko numvaga nta kibazo binteye.”

Yakomeje avuga ko abahakana iyi gahunda ari abirengagiza ukuri cyangwa batigeze bagira amahirwe yo kugera ahabera ibiganiro ngo birebere uburyo Abahutu n’Abatutsi basabana imbabazi.

Yatanze ingero nyinshi zitandukanye zirimo n’urwo mu cyahoze ari Kaminuza Nkuru y’u Rwanda (NUR) umunyeshuri w’Umuhutu yatanze ubuhamya ku ipfunwe aterwa n’uko ise wari umusirikare yishe abantu benshi.

Ariko kubera ubwo buhamya undi munyeshuri w’Umututsi warokotse wari ufite gahunda yo kuzapfa yihoreye agira agahunda nawe arahaguruka avuga imigambi yari afite aniyemeza kubabarira Abahutu bose kuko yasanze bose atari babi hari n’abo ingaruka zigeraho nyamara nta ruhare babigizemo.

Benshi mu bagize Diaspora bafashe amagambo bagarutse ku ruhare rwabo mu gufasha Leta kumvikanisha iyi gahunda. Biyemeje ko bazasobanurira bagenzi babo batandukanye iby’iyi gahunda.

Aba Banyarwanda bari bitabiriye umushyikirano wa 11 wabaye mu cyumweru gishize, bari baturutse mu bihugu bigera kuri 20 byo muri Afurika, u Burayi, Amerika na Aziya.

Emmanuel N. Hitimana