Dr Sabin Nsanzimana, Minisitiri w’ubuzima

Yabitangaje mu nama y’igihugu y’umushyikirano yabaye ku nshuro ya 18, yamaze iminsi ibiri, ikaba yari ihuriwemo n’abayobozi mu nzego zitandukanye, Minisitiri Dr Sabin Nsanzimana yagaragaje ko zimwe mu ndwara zituma abantu bajya kwa muganga zituruka ku mwanda ariko cyane cyane kutagira isuku yo mu kanwa.

Ati “Ubundi indwara ziri ku kigero cya 85 % zishobora gukumirwa no kwirindwa abarwayi twakira ku bigo nderabuzima no kubitaro by’uturere abenshi baba barwaye indwara ziterwa n’umwanda uturuka kutagira ubwiherero bwujuje ibyangombwa kudakaraba intoki ariko cyane cyane kutagira isuku yo mukanwa”.

Minisitiri Nsanzimana avuga ko muri abo barwayi bagera kuri 85% abagera kuri 40% muri bo bafite ikibazo cy’indwara zo mu kanwa (oral diseases)
Minisitiri Nsanzimana avuga ko kutoza amenyo bitera indwara nyinshi zirimo izo mukanwa ndetse no kurwara amenyo ubwayo.

Ati “Ubu indwara ziteye inkeke ni indwara zo mu kanwa kubera isuku nkeya abantu bagira bikabakururira kurwara ishinya n’amenyo ndese no kubabara mu muhogo.
Minisitiri Nsanzimana avuga ko byoroshye cyane kurwanya izi ndwara zikaranduka burundu kuko buri wese yitabiriye kugira isuku byamufasha kwirinda kuzirwara.

Ati “Abenshi ntiboza mu kanwa nyuma yo kurya ibiryo byagiyemo umunyu, ibintu birimo isukari ndetse hari n’abarenzaho ikigage, n’izindi nzoga byakwiyongeraho aside ziba mu byo kurya ugasanga umuntu byamuteye uburwayi”.

Minisitiri Nsanzimana atanga inama z’uko abantu bagira isuku cyane iyo mukanwa ko nta kindi bisaba uretse koza amenyo nyuma yo kurya.

Avuga ko mu ngamba Minisiteri y’ubuzima ifite harimo no gukangurira abantu kwita ku isuku kuko ari yo soko y’ubuzima.

Reba ibindi muri iyi video:

MENYA UMWANDITSI

Ernestine Musanabera

Umunyamakuru

@ musanatines

Reba inkuru zose nanditse ( 1474 )