Ibi barabisaba mu gihe kuri uyu wa mbere tariki 15/12/2014, mu karere bari kwibuka itariki amakimbirane yo muri Sudani y’Amajyepfo yatangiriyeho, nk’uko bitangazwa Christine Muhongerwa, uyoboye umuryango witwa Safer Rwanda.

Yagize ati “Tumaze iminsi dukorana n’indi miryango mpuzamahanga itegamiye kuri leta kugira ngo mu ntego z’ikinyagihumbi (MDGs) za nyuma ya 2015 hajyemo amahoro n’umutekano. MDGs zishize nta hantu hagaragara amahoro n’umutekano. Mbere y’uko utekereza amazi meza, mbere y’uko utekereza ibindi ugomba kuba ufite umutekano n’amahoro”.

Muhongerwa uyobora SAFER Rwanda atangaza ko isomo ry’amakimbirane ari kubera muri Sudani y’Amajyepfo akwiye kubera ibihugu by’akarere isomo bigashaka icyagarura amahoro.

Uyu muryango usanzwe uharanira amahoro, umutekano, iterambere ry’icyaro no kurwanya ikwirakwiza ry’intwaro nto, wemeza ko kimwe mu byatuma habaho amahoro arambye mu karere ari uko ibihugu byashyiramo ingufu mu gucunga ko izi ntwaro nto zikwirakwizwa.

Uyu muryango uvuga ko ibihugu bitandukanye by’akarere bikwiye kwigira ku mvururu ziri kubera muri Sudani y’Amajyepfo mu rwego rwo gushyiraho umurongo wo gukumira ko hari ahandi byaba.

U Rwanda nka kimwe mu bihugu bigize umuryango ushinzwe kurwanya ikwirakwizwa ry’intwaro nto mu karere (RECSA), ni urwa mbere mu kurwanya ikwirakwizwa ry’intwaro kuko rumaze gusenya intwaro zirenga toni ibihumbi 53 n’amasasu arenga toni ibihumbi 40 kuva muri Nzeri 1994.

N’ubwo uyu muryango ukora mu bihugu bigera kuri 14 ngo ibi bihugu ntibikora intwaro nto ahubwo inyinshi zikorwa n’ibihugu byo ku mugabane w’u Burayi, Aziya na Amerika zikoherezwa mu bihugu bya Afurika gukoreshwa mu kumena amaraso.

Iyi miryango kandi ishimira intambwe leta y’u Rwanda ikora mu rwego rwo kubungabunga amahoro muri Afurika no mu karere, aho kugeza ubu ingabo z’igihugu na Polisi y’igihugu bicunga umutekano mu bihugu nka Sudani y’Epfo, Mali, Cote d’Ivoire, Repubulika ya Centre Afrika na Haiti.

Emmanuel N. Hitimana