Bimwe mu bikorwa biteganyijwe kuzakorwa n’izi ntore harimo gutera ibiti mu mudugudu w’icyitegererezo ahitwa i Nyarushishi hagashyirwamo imihanda , kubarura intore zizatozwa muri uyu mwaka wa 2013 no gukora ubukangurambaga mu gukumira ubwandu bushya bwa SIDA.

Hari kandi kubarura no kwigisha abatazi gusoma no kwandika, gukangurira ababyeyi kwandikisha abana ndetse no gukangurira abatwite kubyarira kwa muganga no kuzakangurira abaturage batandikishije ubutaka kubikora.

Ku munsi wa mbere izi ntore zatangiriye ku gikorwa cy’ubukangurambaga bwo gutanga inyigisho zo gukumira ubwandu bushya bwa Virusi itera SIDA kimwe n’izindi ndwara zandurira mu mibonano mpuzabitsina idakingiye; nkuko bisobanurwa na Nzamwita Japhet, Intore yo kurugerero ihagarariye izindi mu murenge wa Nkungu.

Shingiro Boris wari uhagarariye umutahira w’Intore ku rwego rw’igihugu, yasobanuye ko ibikorwa byo k urugero biri mu byatumaga igihugu gitera imbere, bityo ngo iki ni igihe cyo kugira icyo ukorera igihugu cyawe ngo gitere imbere, aho gutegereza ko aricyo kizagira icyo kikugezaho, indetse avugako intego nkuru y’urugerero ari ukurwanya ubukene.

Umuyobozi w’Akarere ka Rusizi yasabye Intore gukora cyane kugira ngo igihugu kirusheho gutera imbere, kuko ari bo maboko igihugu gifite, bityo mu mezi atatu ibi bikorwa bizamara bakaba bategerejweho umusaruro ufatika.

Mu mirenge 18 igize akarere ka Rusizi habarizwamo Intore zo kurugerero zigera ku 2900, abaturage bakaba bategerezanyije amatsiko umusaruro w’izi ntore ngo kuko basanga amateka yahozeho yo gutungwa n‘imbaraga z’abaturage b’ibindi bihugu ashobora guhinduka.

Biteganyije ko ibikorwa by’izi ntore zo kurugerero bizajya bikorwa mu minsi itanu mu cyumweru, ni ukuvuga kuva kuwa mbere kugeza kuwa gatanu, ariko mbere ya saa sita gusa.

Musabwa Euphrem