Babitangaje kuri uyu wa 12 Kanama 2015, ubwo bwahuraga n’inzego zitandukanye mu Karere ka Ruhango, bukagaragarizwa aho iki gikorwa kigeze n’uko cyagenze.

Abayobozi ba Unity Club baganira n’abayobozi mu Karere ka Ruhango.

Abanyamabanga nshingwabikorwa b’imirenge y’Akarere ka Ruhango, bakaba barabagaragarije uko iki gikorwa cyakozwe mu kagari no mimidugudu.

Umunyamabanga Nshingwabikorwa wa Unity Club, Regine Iyamuremye, avuga ko hari aho abayobozi wasangaga iki gikorwa batagikora neza, kuko wasangaga hari abantu bahisemo bitewe n’uko babazi bakaba arinbo bita “Abarinzi b’Igihango”, nyamara ubundi kubatoranya bikorwa n’abaturage babana na bo umunsi ku wundi.

Ashimira abayobozi b’Akarere ka Ruhango uburyo iki gikorwa bagikoze, kuko bicaranye n’abaturage bagafatanya mu guhitamo “Abarinzi b’Igihango”.

Yabasabye gukomeza gukora neza icyo gikorwa no ku rwego rw’akarere kugeza kigeze ku rwego rw’igihugu, aho hazatoranywamo abazahembwa kubera ubumuntu bagaragarije Abanyarwanda.

Abayobozi b’Akarere ka Ruhango biyemeje gukomeza kunoza igikorwa cyo gutoranya "Abarinzi b’Igihango".

Umuyobozi w’Akarere ka Ruhango Wungirije ushinzwe Imibereho Myiza y’Abaturage, Mugeni Jolie Germaine, yijeje ubuyobozi bwa Unity Club, ko iki gikorwa bazakomeza kugikurikirana neza kugeza gitanze umusaruro cyitezweho.

Biteganyijwe ko Abarinzi b’Igihango” bamaze gutoranywa mu tugari, bazagaragarizwa abaturage bose mu gikorwa cy’umuganda rusange uzaba tariki ya 05/09/2015. Naho kumurika “Abarinzi b’Igihango” ku rwego rw’igihugu bikaba bizaba tariki ya 16 Ukwakira 2015.

Igikorwa cyo guhitamo “Abarinzi b’Igihango” kigamije kumenya, kumenyekanisha no guha agaciro ibikorwa ntangarugero mu bumwe n’ubwiyunge byakozwe n’Abanyarwanda ubwabo himakazwa Ubunyarwanda.

Eric Muvara