Urutonde rw’ibyiciro by’ubudehe abaturage bashyizwemo bimanitse ku biro bya buri kagari ko mu Murenge wa Busasamana ariko bamwe mu bajya kubireba batungurwa n’ibyiciro barimo bakavuga ko bitajyanye n’ubushobozi bafite mu miryango.

Abaturage bireba ku malisiti ngo barebe ibyiciro by’ubudehe bashyizwemo.

Nyinawumuntu Clementine, umuturage wo mu Kagari ka Kibinja mu Murenge wa Busasamana, avuga ko yisanze ku rutonde rw’abantu bashyizwe mu cyiciro cya gatatu cy’ubudehe bikamutangaza.

Agira ati “ Ntabwo nkwiriye rwose gushyirwa mu cyiciro cya gatatu cy’ubudehe kuko nta kintu na kimwe mfite kinshyira muri iki cyiciro”.

Avuga ko abari muri iki cyiciro batanga ubwisungane mu kwivuza bw’ibihumbi birindwi by’amafaranga y’u Rwanda bavuye ku bihumbi bitatu bari basanzwe batanga.

Ati “Amafaranga ibihumbi bitatu y’ubwisungane mu kwivuza nyatanga bingoye. None ibihumbi birindwi ku bantu batanu ntunze iwanjye mu rugo nayabona nte?”

Akomeza avuga ko ibyiciro bashyizwemo atari byo bari bemeje mu nama abaturage bakoze ku rwego rw’imidugudu batuyemo akaba ari yo mpamvu ngo biteguye kujurira.

Urutonde rwakozwe mu midugudu ngo rwari rwamushyize mu cyiciro cya kabiri cy’ubudehe ariko nyuma atungurwa no gusanga urutonde rwasohotse rwamuzamuye mu cyiciro cy’ubudehe gishyirwamo abakozi n’abandi bantu bafite amafaranga babona mu buryo buhoraho.

Maniramfasha Martin, na we n’undi muturage uvuga ko yatunguwe no gusanga yazamuwe mu cyiciro akava mu cya mbere agashyirwa mu cya gatatu atazi impamvu byakozwe.

Mu ijwi rinini kandi jijujutira icyiciro cy’ubudehe yashyizwemo yagize ati “Njye nari nishyize mu cyiciro cya mbere ariko ukuntu baje kubihindura ni byo ntazi.”

Umunyamabanga Nshingwabikorwa w’Umurenge wa Busasamana, Gasore Clement, we avuga ko habayeho ikosa mu bakoze urutonde ariko ko abaturage batanyuzwe n’ibyiciro by’ubudehe bashyizwemo bafite uburenganzira bwo kubijuririra bigahinduka.

Jean Pierre Twizeyeyezu