Umuyobozi w’Akarere ka Nyamasheke w’agateganyo, Bahizi Charles, akaba yasabye urwo rubyiruko kuba intangarugero haba mu myifatire ndetse no mu bikorwa bibateza imbere. Ibi Bahizi abivugira ko ngo adashidikanya ko umuntu wavomye ku nyigisho z’i Wawa aba afite itandukaniro n’abo bari bari mu cyiciro kimwe ariko bakaba batarashoboye kugera kuri icyo kirwa.

Yagize ati “Turabasaba rwose guhinduka ubumenyi muvanye mu mahugurwa mukabushyira mu bikorwa, mukaba urugero rw’uko mwaretse ibiyobyabwenge mutari abajura kandi ko mutari n’abasambanyi. Abantu bakazabubahira ko muri abakozi kandi ko hari icyo mwigejejeho”.

Uru rubyiruko rwasoje amahugurwa kuri uyu wa 3 Gashyantare 2015 i Wawa rwakiriwe none kugira ngo rwerekeze iwabo mu miryango ruvuga ko rwamaze guhinduka rukazaba intangarugero rwihatira kwihangira imirimo, gukora no kwirinda ibyobyabwenge.

Tuyishime Emmanuel, umwe muri abo basore, avuga ko babonye amahugurwa atandukanye azatuma babasha kwihangira imirimo bakareka imigenzo mibi bari bafite ubwo bajyanwaga i Wawa.

Amwe mu makosa avuga ko baretse ngo harimo kwigira indakoreka, ubujura, ubusambanyi, kunywa ibiyobyabwenge n’ibindi none ubu ngo bakaba barahindutsemo abantu b’ingirakamaro kandi bazakorera igihugu cyabo.

Agira ati “Ubu twarahindutse rwose, icyatumye tujya kugororwa ntituzagisubiramo ndetse tuzafasha n’abandi guhindura imigenzereze yabo.” Uyu musore akomeza avuga ko batojwe ikinyabupfura ndetse bakanigishwa imyuga none ubu ngo bakaba bagiye kujya ku isoko ry’umurimo bakareka ibyabagomeshaga.

Ubwo rwari i Wawa, kimwe mu byatangaje uru rubyiruko ngo akaba ari uko iyo uhageza uhasanga n’abantu ngo bitwa ko bize banafite impamyabushobozi zo ku rwego rwa kaminuza ariko ngo bakaba barananiwe n’ubuzima. Bityo bakaba bavuga ko kugira imyitwarire myiza bireba buri wese kandi ko bakurikije ibyo bavanye i Wawa basanga buri muntu ashobora guhinduka akaba intagarugero mu bandi.

Umugwaneza Jean Claude