Andrew Rucyahana ukuriye Inama Nkuru y’urubyiruko mu Karere ka Musanze yavuze ko bagiye kongera imbaraga mu guhanahana amakuru, baba ijisho ry’aho batuye kugira ngo hatagira igihungabanya umutekano.

Uyu muyobozi yemeza ko urubyiruko niruhugugira mu bikorwa byo kwiteza imbere, nta rubyiruko ruzijandika mu bikorwa by’umwanzi.
Andrew Rucyahana yagize ati: “Iyo umuntu adafite umurimo ahugira mu bibi no mu bitamwubaka, uko turushaho guhugira mu mirimo itwubaka ni ko n’aba-jeune bitabira ibi bikorwa bazabura.”

Abahagarariye urubyiruko mu mirenge itandukanye bitabiriye iyo nteko rusange na bo bashimangira ko nibaramuka bibumbiye mu makoperative bakihangira imirimo ibageza ku gukirigita ifaranga, abarwanya igihugu babizeza ibitangaza ngo ntibazabona aho bamenera kugira ngo babakoreshe mu bikorwa bihunganya umudendezo w’igihugu.

Abe Marie Aimee, umwe mu bagize komite y’urubyiruko mu Murenge wa Muko yagize ati: “Ingamba dufashe ni uko tugiye gusobanurira urubyiruko... kwirinda abantu babereka ko nta mafaranga ahubwo tukabashishikariza ko bagomba gukora cyane cyane nidukora dushyize hamwe ibyo dushaka tuzabigeraho...”.

Mugenzi we witwa Ndoli Jean Baptiste yunzemo agira ati: “Twafashe ingamba ko ibi bintu bitazongera kubaho, aba-jeune babanze gukunda igihugu, ikindi bagakura amaboko mu mufuka bagakora.”

Urubyiruko rwagaragaye mu bikorwa byo guhungabanya umutekano no gukorana na FDLR bimaze iminsi bivugwa mu Karere ka Musanze byahitanye ubuzima bw’Abanyarwanda, abandi barakomereka.

Muri iyi nteko rusange bahawe ibiganiro ku mutekano no kwihangira imirimo. Basabwe kwizigamira duke babona kandi bakitabira gukorana n’ibigo by’imari ngo babashe kubona inguzanyo zo gukora umushinga wo kwiteza imbere.

Urubyiruko ruhagarariye abandi mu mirenge yose y’Akarere ka Musanze, kuri uyu wa Gatatu tariki 04/06/2014 rurasura Urwibutso rwa Gisozi mu rwego rwo gusobanukirwa uburyo Jenoside yakorewe Abatutsi yacuzwe inashyirwa mu bikorwa dore ko harimo benshi bavutse nyuma y’ayo.

Nshimiyimana Leonard