Ibi Minisitiri Mukantabana yabisabye aba banyarwanda ubwo kuwa 15/01/2013 yari mu Karere ka Bugesera abashyikiriza inkunga y’ibiribwa yatanzwe n’umuryango Direct Aid.

Yagize ati “ntabwo bwikwiye ko bakomeza gufashwa, nabo nibarebe ibyo bakora bibinjiriza kuko ntabwo buri gihe bazakomeza kubona ababaha inkunga kuko batazahoraho”.

Minisitiri Mukantabana n’Umuyobozi wa Direct Aid bashyikiriza abanyarwanda birukanywe muri Tanzaniya inkunga babazaniye.

Minisitiri Mukantabana avuga ko hari umushinga bafite wo gushakira urubyiruko rwabo banyarwanda rutagize amahirwe yo kwiga uburyo bakwigishwa imyuga ndetse bigafasha n’abandi bacikishirije amashuri.

“Turashaka kubigisha imyuga hanyuma bakibumbira mu mashyirahamwe ariho tuzahera tubafasha maze bagashaka ibindi bibunganira bitari ubuhinzi ndetse n’ubworozi,” Minisitiri Mukantaban.

Ku rundi ruhande ariko, abirukanwe mu gihugu cya Tanzaniya baravuga ko nabo bitabashimisha guhora bateze amaboko kuko ntacyo badakora kugira ngo babashe gukora bashaka kwiteza imbere, bagasaba ko bahabwa amasambu nabo bagahinga, nk’uko bivugwa n’umwe muri witwa Semana John.

Ati “icyo dushaka ni ubutaka, tububonye twahinga natwe ntiduhore duteze inkunga. Erega ntacyo tudakora kuko ubu uretse no guhinga n’indi mirimo yose yaboneka twayikora ariko ntayo tubona”.

Inkunga bahawe izabafasha mu gihe cy’amezi atatu.

Inkunga ingana n’umuceri ibiro 50, kawunga ibiro 50, ibiro 40 by’ibishyimbo, ikarito y’isabune n’ijerekani ya litiro 20 y’amavuta yo guteka niyo yashyikirijwe buri muryango. Imiryango 253 yahawe inkunga ifite agaciro ka miliyoni 27 z’amafaranga y’u Rwanda yatanzwe n’umuryango Direct aid.

Umuyobozi w’umuryango Action Aid ku rwego rw’Akarere k’Afurika y’Iburasirazuba, Mussa Idris aravuga ko iyi nkunga bayizaniye aba banyarwanda kuko basanze bafite ibibazo byinshi, cyane ibijyanye n’ibyo kurya.

Yagize ati “kubera ko turi bamwe mubafatanya bikorwa b’Akarere ka Bugesera, twabonye ibibazo aba banyarwanda birukanywe mu gihugu cya Tanzaniya bafite twihutira natwe kugira icyo twabafasha. Bwa mbere twazanye inkunga iba nke ariko ubu twazanye ibikwiriye buri wese, ku buryo bazabimarana amezi ari hagati y;abiri ndetse n’atatu”.

Abahawe inkunga ngo barishimira uburyo bakomeje kwitabwaho.

Mu miryango 253 yatujwe mu Karere ka Bugesera, igera kuri 218 niyo imaze gutuzwa mu mazu yubakiwe, ariko ngo kubufatanye n’abafatanyikorwa b’akarere (JADF) n’abandi basigaye bagiye kubonerwa aho gutura, dore bishyize hamwe bagatanga miliyoni 16 zo kububakira.

Uretse ibyo kandi iyo miryango yose yemerewe inka ikaba izazishyikirizwa mu minsi mike.

Egide Kayiranga