Abaturage ngo baracyabura amakuru menshi ku bijyanye n’ubuzima, nk’uko umuryango Society for Family Health(SFH)wita ku buzima, hamwe na MHC babibwiye abanyamakuru.

Abanyamakuru basabwa gucukumbura ku byangombwa mu kuboneza urubyaro, kwirinda SIDA n’izindi ndwawa hamwe no kwita ku isuku n’isukura bikoreshwa n’abaturage.

SFH yatanze urugero rw’aho abacuruzi b’udukingirizo ngo batajya badushyira ahagaragara mu maduka, byakubitiraho n’uko abaturage batinya gusaba utwo dukingirizo, bigatuma abantu barushaho gukora imibonano mpuzabitsina idakingiye.

Ntaganira Cyrus ushinzwe ibikorwa by’ubucuruzi muri SFH yagize ati "Ibura ry’udukingirizo rishobora guterwa n’uko abaducuruza batadushyira ahagaragara".

Ibi ngo byagakwiriye guha abanyamakuru gucukumbura inkuru nk’izi zirebana n’ubuzima, nk’uko Umuyobozi wa SFH, Manasseh Gihana Wandera, yabisabye abanyamakuru mu mahugurwa uyu muryango wabageneye kuri uyu wa gatatu.

Yagize ati"Hari ikigero cy’imyumvire abaturage batarageraho mu bijyanye no kuboneza urubyaro, kwirinda icyorezo cya SIDA, malariya n’izindi ndwara, tukaba dusaba itangazamakuru gucukumbura inkuru zijyanye n’ubuzima".

Umunyamabanga Nshingwabikorwa w’Inama Nkuru y’itangazamakuru, Peacemaker Mbungiramihigo, na we yashimangiye ko abona itangazamakuru rikwiriye kuva muri politiki, rikavuga no ku buzima.

Abanyamakuru na bo barasaba koroherezwa kubona amakuru ajyanye n’ubuzima.

Ku rundi ruhande, abanyamakuru bavuze ko hakiri aho inzego z’ubuzima zitaborohereza kubona amakuru, ngo zitwaje ingingo z’itegeko ribasaba kugirira ibanga umurwayi.

Umuryango Society for Family Health uravuga ko n’ubwo wageze ku ntego yawo muri uyu mwaka, yo gutanga udukingirizo tugera kuri miliyoni 16, ngo hakiri benshi badukeneye.

Uyu muryango uterwa inkunga na Leta Zunze Ubumwe z’ Amerika, ukora ubukangurambaga ukanatanga ibyangombwa byo kwita ku buzima n’ isuku n’isukura; wumvikanye na Leta y’u Rwanda uburyo bwo korohereza abaturage kwirinda kubyara indahekana, SIDA, Malaria n’izindi ndwara ziterwa n’isuku nke.

Simon Kamuzinzi