Murego Abdul Karim, umwe mu bahagarariye imodoka zitwara abagenzi mu Karere ka Kayonza abisobanura agira ati “Umuntu uwo ari we wese ushaka kujya mu bijyanye n’ubwikorezi akwiye kubanza guhabwa amahugurwa ku bijyanye n’amategeko y’umuhanda, kubera ko kenshi abatwara amagare bateza impanuka kuko batazi amategeko y’umuhanda”.

Abashoferi batwara imodoka zitwara abagenzi ni bamwe mu bashinja abanyamagare guteza akajagari mu muhanda.

Nubwo abatwara amagare bavugwaho kutamenya amategeko y’umuhanda no kutayakurikiza bo ntibabyemera. Bavuga ko bafite amashuri abigisha amategeko y’umuhanda ku buryo bw’umwihariko ndetse bamwe muri bo ngo bamaze no kubona impushya za burundu zibemerera gutwara ibinyabiziga, nk’uko Munyaneza Amza wo muri koperative y’abatwara amagare abivuga.

Avuga ko igitera impanuka kidakwiye gushakirwa ku banyamagare gusa kuko kenshi ngo bakoreshwa impanuka n’ibindi binyabiziga kubera ko bitabaha agaciro mu muhanda.

Agira ati “Mu muhanda wa kaburimbo iyo imodoka zigiye kunyuranaho usanga bagonga abanyamagare, imodoka yakugeraho ntibone ko nawe uri gukoresha umuhanda nk’umuntu ubifitiye uburenganzira, akaba ataguha agaciro agashaka kukugonga impanuka ikaba irabaye”.

Abanyamagare baregwa kudakurikiza amategeko y’umuhanda.

Iki kibazo cyo kwitana ba mwana hagati y’abanyamagare n’abatwara ibinyabiziga bifite moteri si icya none, dore ko n’igihe hafatwaga icyemezo cyo guca amagare mu mihanda ya kaburimbo umwaka ushize hari abashoferi biruhukije bavuga ko bakize akajagari k’abanyamagare mu mihanda.

Cyakora gukemura iki kibazo bisa n’aho bikwiye kurenga kwitana ba mwana no gusuzugurana mu muhanda, kuko buri wese mu muhanda aba atanga serivisi kandi ikenewe n’abatari bake, nk’uko umuyobozi w’Akarere ka Kayonza, Mugabo John abivuga.

Yongeraho ko kugira ngo icyo kibazo gikemuke abantu bakwiye kubahana mu muhanda, kuko uretse kuba buri wese ukorera mu muhanda hari serivisi aba atanga kandi ikenewe n’abatari bake, umuntu ashobora no kuba atwara igare uyu munsi ejo akaba atwara moto cyangwa imodoka.

Mugabo avuga ko abakoresha umuhanda bose bakwiye kubahana kugira ngo ukoreshwe neza.

Abisobanura agira ati “Kubahana mu muhanda ni ikintu cy’ingenzi cyane. Niba umuntu atwara igare uyu munsi ejo ashobora kuzaba atwara moto cyangwa imodoka. Aratanga serivisi kuko hari abakeneye serivisi y’umunyegare, hari abakeneye iya moto n’abakeneye serivisi y’imodoka. Buri wese agomba kubahwa rero”.

Nubwo abanyonzi batera utwatsi ababitirira impanuka zikunze kubera ku mihanda minini, ntibahakana ko hari iziterwa n’amagare. Gusa bavuga ko kenshi usanga ari nk’umuntu uba avuye mu bice by’icyaro akishora muri kaburimbo kandi atazi amategeko y’umuhanda, yateza impanuka bikitirirwa abanyamagare bose.

Cyprien M. Ngendahimana