Never Again Rwanda wigenga ugamije kubaka amahoro arambye no guharanira uburenganzira bwa muntu mu Rwanda, yatangije ibi biganiro bizagera hirya no hino mu gihugu mu rwego rwo gushyigikira gahunda ya leta yo guteza imbere uruhare rw’abaturage mu miyoborere.

Iyi gahunda kandi izatuma abaturage barushaho gukoresha neza uburyo busanzwe buhari bwo guhanahana amakuru hagati y’abaturage n’abayobozi, kugira ngo barusheho kugira uruhare mu bibakorerwa, nk’uko Eric Mahoro umuyobozi w’uyu muryango yabitangaje.

Yagize ati “Tunejejwe cyane no gukorana n’ubuyobozi bw’ Akarere ka Karongi muri uyu muhango wo gutangiza ku umugaragaro gahunda y’amatsinda y’abaturage agamije imiyoborere myiza.Twizeye kandi kuzakomeza gukorana neza n’akarere ka Karongi ndetse n’utundi turere icyenda iyi gahunda y’amatsinda izakoreramo.”

Mahoro yasobanuye ko buri tsinda ry’ibiganiro rizaba rigizwe n’abaturage 30 bazaturuka mu byiciro byose by’Abanyarwanda biri aho batuye. Avuga ko mu gutoranya abagize itsinda kandi, uburinganire bwarubahirijwe kuko itsinda ry’ibiganiro riyoborwa n’abahuzabiganiro babiri.

Marie Claire umwe mu bahuzabiganiro wo muri Karongi, agira ati “Ndumva mfite ubumenyi buhagije mu gukumira no gukemura amakimbirane aramutse agaragaye mu itsinda ryacu . Nungutse kandi byinshi uko nahuza ibiganiro by’abantu bafite ibitekerezo bidasa.”

Umuyobozi Mukuru Wungirije mu Kigo cy’Igihugu Gishinzwe Imiyoborere (RGB) Amb. Fatuma Ndangiza yashimye aya matsida y’ibiganiro kuko aje yunganira gahunda ya Leta igamije guha umuturage ijambo mu bimukorera kuko izagabanya icyuho cyagaragaraga hagati y’abaturage n’inzego zifata ibyemezo.

Gahunda y’amatsinda y’abaturage agamije imiyoborere myiza, ni kimwe mu bikorwa bigize gahunda y’igihe kirekire, umuryango Never Again Rwanda uterwamo inkunga n’Ikigo mpuzamahanga cy’ Abanyasuwede kigamije iterambere (Swedish International Development Agency (Sida).

Iyi gahunda igamije gushimangira intambwe imaze guterwa mu kubaka amahoro arambye hashingiwe ku komora ibikomere byatewe na Jenoside yakorewe Abatutsi n’andi mateka abanyarwanda banyuzemo.

Uturere 10 nitwo ibi biganiro bizaberamo ari two Karongi, Nyabihu, Gicumbi, Musanze, Rwamagana, Bugesera, Huye, Nyaruguru, Nyarugenge na Gasabo.

Emmanuel N. Hitimana