Uru rugendo rwateguwe nyuma y’uko Inteko ishingamategeko y’u Rwanda yemeye ubusabe bw’Abanyarwanda basaga miliyoni eshatu, basabye mu nyandiko ko ingingo y’Itegeko nshinga, ibuza umukuru w’igihugu kwiyamamariza kuyobora inshuro zirenze ibyeri.

Iki gikorwa kizarangira ku itariki 11 Kanama 2015, mu karere ka Kamonyi cyahereye mu mudugudu wa Taba ho mu murenge wa Rukoma, abaturage b’ingeri zitandukanye bakaba basabye abadepite ko ingingo ya 101 y’itegeko nshinga yavugururwa bakongera bagatora Kagame ugiye kurangiza kuyobora manda ebyiri yatorewe.

Iyi ngingo rero ngo basanga ikumira perezida wa Repubulika Paul Kagame kongera kwiyamamaza ngo ayobore manda ya gatatu kandi amaze kubageza ku byiza byinshi, birimo umutekano, iterambere, imibereho myiza, n’imiyoborere myiza.

Bashimiye inteko ishinga amategeko y’u Rwanda ko itasubije inyuma ubusabe mu nyandiko bakoze, maze bongera gusaba ko hakorwa Kamarampaka bagatorera ko iyo ngingo ihinduka.

Umwe muri bo aragira ati “Icyifuzo cyacu ni uko Paul Kagame atuyobora, ndetse byaba ngombwa akatuyobora kugeza ubwo twimuriwe mu ijuru.”

Itegeko nshinga igihugu kigenderaho ryatowe n’abaturage mu mwaka wa 2003, ariko abaturage basobanura ko impamvu iyo ngingo batari basabye ko ivugururwa mbere yo kuritora, ari uko batari bakabonye ko bambaye ikirezi ari cyo kuyoborwa na Paul Kagame.

Depite Mukarugema Alphonsine wazanye na Mukakarangwa Clotilde kumva ibitekerezo by’abaturage, yabijeje ko ubutumwa bwa bo azabugeza mu nteko bagafatanya n’izindi ntumwa za rubanda kubyigaho.

Yagize ati “Uyu ni umurenge wa mbere duhereyeho kandi tugomba kuzenguruka n’indi mirenge 11 y’akarere ka Kamonyi twumva ibitekerezo by’abaturage. Tuzabihuza n’iby’izindi ntumwa za rubanda ziri mu tundi turere, tubifatire umwanzuro.”

Aba baturage barasaba ko ingingo ibuza kagame kongera kwiyamamaza ivugururwa, ariko ntibagaragaza umubare wa manda zashyirwamo, uretse ko hari n’abifuza ko Kagame yakomeza kuyobora inshuro zose azashaka kuko bavuga ko nta wundi wamuyingayinga.

Marie Josee Uwiringira