Abayobozi 18 mu gihugu cya Somalia nibo bari basuye u Rwanda kuva tariki ya 6/12/2014, aho bashoboye gusura urwibutso rwa Gisozi, Minisiteri y’Imari n’igenamigambi, ikigo cy’igihugu gishinzwe amakoperative, ishyirahamwe ry’uturere n’umujyi wa Kigali, ikigo cy’igihugu gishinzwe iterambere (RDB), Minisiteri y’ubucuruzi hamwe na Minisiteri y’ubutegetsi bw’igihugu.

Ahandi basuye ni uturere twa Bugesera na Rubavu kugira ngo barebe uburyo inzego zibanze zikora ndetse zifatanyije n’abikorera, bakaba barasuye n’imipaka ya Nemba na Petite Barriere mu karere ka Rubavu bareba uburyo urwego rw’abinjira n’abasohoka rukora hakoreshejwe ikoranabuhanga.

Abdelmalik Jama Mohammed, umujyanama mu bukungu n’iterambere mu muryango wa International Labour organization muri Somalia avuga ko bishimira ibyo babonye mu Rwanda kandi bitangaje ukuntu igihugu nk’u Rwanda cyabayemo Jenoside cyakwiyubaka kurenza bimwe mu bihugu bitahuye n’intambara.

Abdelmalik avuga ko bahereye ku byo babonye mu Rwanda bafite icyizere ko bifashishije u Rwanda nabo bashobora kugarura umutekano kandi bakwiyubakira igihugu, cyane ko icyo bashaka ari ukubaka igihugu bahereye ku nzego za leta n’abikorera, ibi bakabigeraho babanje kugarura umutekano no gushyiraho amategeko ahamye.

Umuyobozi w’akarere ka Rubavu, Sheikh Bahame Hassan, avuga ko gusurwa n’ibindi bihugu bibaha ishema ry’ibyo bakora kandi bagakomeza kwigirira icyizere ko ibyo bakora bigirira n’abandi akamaro.

Sylidio Sebuharara