Uru ruzinduko rwari rugamije kwigira ku iterambere n’imibereho myiza, umuryango FPR Inkotanyi umaze kugeza ku batuye Akarere ka Gatsibo ndetse n’Abanyarwanda bose muri rusanjye nyuma y’amahano ya Jenoside yakorewe Abatutsi mu 1994.

Dr. Anna Itto wari uyoboye iri tsinda, yavuze ko ubunararibonye bakuye ku buyobozi bw’igihugu cy’u Rwanda by’umwihariko umuryano wa FPR Inkotanyi, mu kugeza iterambere rirambye ku Banyarwanda, bugiye kubabera ikitegererezo bakaba aribyo bajyanye mu gihugu cyabo nk’igihugu kimaze igihe gito kibonye ubwigenge kikaba kikirangwamo amakimbirane y’intambara.

Abashyitsi bamurikirwa gahunda z’imiyoborere myiza mu kuzamura iterambere ry’abaturage mu karere ka Gatsibo.

Ruboneza Ambroise, Chairman w’Umuryango wa FPR mu karere ka Gatsibo akaba n’umuyobozi w’aka karere, avuga ko kugira ngo igihugu nka Sudani y’amajyepfo kize kurebera ku Rwanda ibyagezweho nyuma ya Jenoside yakorewe abatutsi, ari ishema rikomeye ku karere ka Gatsibo ndetse no ku gihugu cyose muri rusange.

Yagize ati: “Kuba ibihugu by’amahanga biza kurebera ku Rwanda gahunda z’imiyoborere myiza ni ibyishimo, nta kindi tubikesha uretse ubuyobozi bwiza bushyira imbere inyungu z’Abanyarwanda.”

Mu bikorwa by’iterambere byasuwe n’aba bashyitsi harimo; Koperative y’abahinzi b’umuceri ya COPRORIZ Ntende, ifatwa nka koperative y’ikitegererezo mu kweza igihinwa cy’umuceri cyane mu karere ka Gatsibo, bakaba banasuye uruganda rutunganya umuceri ruzwi ku izina rya Gatsibo Rice Company meal.

Abashyitsi hamwe n’ubuyobozi bw’Akarere ka Gatsibo bafata ifoto y’urwibutso.

Aba bashyitsi banasuye kandi ikigo cy’imali cya Kiramuruzi Ukuri Sacco, aho beretswe uburyo abaturage b’Akarere ka Gatsibo bitabiriye gahunda yo gukorana n’ibigo by’imali mu rwego rwo kwivana mu bukene.

Sudani y’amajyepfo ni igihugu cyabonye ubwigenge tariki ya 9 Nyakanga 2011, iki gihugu kikaba cyarakunze kugaragaramo amakimbira atoroshye nyuma yo kubona ubwigenge hakavuka Sudani zombi, iy’amajyaruguru n’iy’amajyepfo.

Benjamin Nyandwi