Ibi bikoresho uru rubyiruko rwabihawe ku wa kane tariki 12 Kamena 2014, bikaba byaratanzwe na Leta y’u Rwanda ibinyujije muri Minisiteri y’ubucuruzi n’inganda MINICOM. Mu bikoresho byatanzwe harimo iby’ububaji, ubudozi n’ibyabakora akazi ko gutunganya imisatsi.

Ubwo yashyikirizaga aba barwiyemezamirimo bashya ibi bikoresho, Minisitiri ufite ubucuruzi n’inganda mu nshingano ze Kanimba Francois wari umushyitsi mukuru muri iki gikorwa, yababwiye ko ibi bikoresho bakwiye kubifata neza bakabibyaza umusaruro ndetse bagatanga n’akazi kuri bagenzi babo batari bagafite.

Minisitiri Kanimba yagize ati: “Kuremera ni umuco wahozeho mu Rwanda kuva na kera, uru rubyiruko turuhaye ibi bikoresho mu rwego rwo kubaha intangiriro kuko bagaragaje ko bafite ubushake bwo gukora kandi nta kabuza bizatanga umusaruro mwiza”.

Minisitiri Francois Kanimba ashyikiriza urubyiruko ibikoresho bizarufasha mu kwihangira imirimo.

Minisitiri Kanimba yakomeje avuga ko ibi bikoresho uru rubyiruko ruhawe ruzabyishyuraho 50%, Leta nayo ikarwishyurira andi 50%, kugira ngo ayo uru rubyiruko ruzishyura azakoreshwe mu gukomeza kuremera urundi rubyiruko iyi gahunda itarageraho.

Rumwe muri uru rubyiruko rwaremewe watangaje ko rwishimiye iyi nkunga rwahawe rukavuga ko rwiteguye kuyibyaza umusaruro ndetse bikaba bigiye no kurufasha kwikura mu bukene.

Uru rubyiruko rwaremewe ibi bikoresho nyuma yo kurangiza amahugurwa mu bijyanye n’imyuga yo kudoda, kubaza no gutunganya imisatsi.

Mu gihugu hose hamaze kuremerwa rubyiruko rugera ku bihumbi 16, ibi byose bikaba ari mu rwego rwo kurushaho guteza imbere gahunda ya Leta ya hanga umurimo iamije kurwanya ubushomeri mu rubyiruko.

Benjamin Nyandwi