Urubyiruko rwaganiriye na Kigali Today ruvuga ko umunsi wa Saint Valentin ufatwa nk’umunsi w’abakundana ntacyo urubwiye kuko ntacyo ruwuziho uretse kubyumva kuri radiyo.

Evariste Masengesho wo mu Murenge wa Kivuruga, asobanura ko nk’umuntu utuye mu cyaro ibya Saint Valentin ntabyo aba azi uretse kubyumva nko kuri za radio bigatuma nawe amenya ko uwo munsi wageze.

Agira ati “saint valentin ntayo nzi nk’umuntu w’umunyacyaro nyine, usibye ko njya mbyumva nko ku maradiyo ngo uyu munsi n’umunsi wa saint valentin nanjye bigatuma menya umunsi izazira, ariko kubera ko ndi umuhinzi simbihe agaciro bikwiriye”.

Ntibizihiza Saint Valentin kuko batayizi uretse kubyumva kuri radiyo.

Theoneste Habumugisha wo mu Murenge wa Busengo, nawe avuga ko yumva bavuga ngo saint valentin ariko ntabihe agaciro kuko aba ahugiye mu kwishakira amafaranga kugira ngo azagire icyo ageraho mu minsi iri imbere.

Ati “numva kuri radiyo bavuga ngo saint valentin ariko jye simbihe agaciro kuko jyewe mbanishakira udufaranga hirya no hino, kugira ngo nanjye nzabashe kuba umusitari (star) mu minsi izaza nanjye”.

Nubwo aba basore basobanura ko badaha agaciro umunsi wa saint valentin bitewe nibyo baba bahugiyemo, siko bimeze ku ruhande rw’abakobwa kuko bo baba biteguye ko bari bwishimane n’abakunzi babo.

Ntacyo umunsi wa Saint Valentin uba ubabwiye kuko baba bahugiye mu mirimo yabo isanzwe.

Florence Nyirumugisha wo mu Murenge wa Kivuruga avuga ko umunsi wa saint Valentin baba biteze ko abo bakundana bagomba kubatumaho bakagenda bakawizihiza.

Ati “uyu munsi ndawizihiza kuko turi buhurire mu isoko na cheri wanjye dufate akantu. Gusa numva dufite nk’amikoro twahurira ahantu tukawizihiza bitewe n’amafaranga dufite ugafata icyo ubona kiri bugushimishe cyigashimisha na cheri wawe”.

Ubusanzwe umunsi wa Saint Valentin ufatwa nk’umunsi w’abakundana wizihizwa ku itariki ya 14 Gashyantare buri mwaka.

Abdul Tarib