Igikorwa cyo guhiga mu Murenge wa Rwankuba ho mu Karere cyatangiriye kuri buri rugo rugize uyu Murenge aho rugaragaza imihigo rugomba kwesa muri uyu mwaka wa 2015-2016, cyakurikiwe n’Abanyamabanga Nshingwabikorwa b’Utugari nabo kuri uyu wa kabiri bahigiye imbere y’Umunyamabanga Nshingwabikorwa w’Umurenge wabo maze basabwa gufata imihigo bahize nk’ivanjiri yabo ya buri munsi kugira ngo ibashe kweswa neza.

Rukesha Emile, Umunyamabanga Nshingwabikorwa w’uyu Murenge ati:” Iyi mihigo mugende muyigire iyanyu kandi mufashe abaturage nabo guhigura imihigo bahize, mbese muyifate nk’ivanjiri yanyu ya buri munsi, uko ugiye kubyuka ukubiteho umutima wibaze aho ugejeje wesa ibyo wahize bizaguha gahunda uri bukorereho uwo munsi.”

Niyikora Richard uyobora Akagari ka Bisesero mu Murenge wa Rwankuba asanga imwe mu nzira nzima yo kubasha kwesa iyi mihigo ari ukurushaho gukorana n’abo bayobora.

Niyikora ati:”Tugiye kwegera abaturage cyane cyane dushyire ingufu mu bukangurambaga kuko nibo bazagira uruhare rukomeye mu iyeswa ry’iyi mihigo.”

Uretse uyu Murenge wa Rwankuba, no mu yindi mirenge yose igize Akarere ka Karongi naho buri rugo ubu rukaba rugomba guhiga imihigo ruzahigura mu mpera z’uyu mwaka w’imihigo wa 2015-2016 kugira ngo muri rusange n’imihigo Akarere kahigiye imbere ya Perezida wa Repubulika ibashe kugerwaho neza.

NDAYISABA Ernest