Ku itariki ya 21 Nzeri yizihizwaho umunsi mpuzamahanga wahariwe amahoro, Minisitiri Nsengimana abwira urubyiruko yagize ati « Amahoro atangirira kuri wowe, njye, n’undi, kugira ngo ushobore kuyageza ku bandi. Ntiwatanga amahoro udafite, nkaba nsaba urubyiruko guharanira amahoro no guharanira kubana neza n’abandi. »

Minisitiri w’urubyiruko n’ikoranabuhanga Jean Philibert Nsengimana

Umunsi mpuzamahanga wahariwe amahoro watekerejwe mu mwaka 1981 n’inama rusange y’umuryango w’abibumbye mu mwanzuro 36/67. Cyakora tariki ya 21 Nzeri yemejwe n’abagize inama rusange y’umuryango wabibumbye muri 2001.

Insanganyamatsiko y’umunsi mpuzamahanga wahariwe amahoro mu mwaka 2015 igira iti « Ubufatanye bw’amahoro, agaciro kuri bose ».

Umunyamabanga w’umuryango wabibumbye Ban Ki Moon, kurin uyu munsi yasabye imitwe ihanganye mu bihugu bitandukanye ku isi gushyira intwaro hasi no gutanga agahenge, bagashyiraho urubuga rw’ibiganiro mu gushaka amahoro.

Ban Ki Moon asaba abahanganye bakoresha intwaro guhagarika intambara kuko abantu bose bifuza amahoro, agasaba urubyiruko kugaragaza ubutumwa buharanira amahoro ikaba inkunga yo guhagarika imirwano ku bahanganye.

Sylidio Sebuharara