Rucagu yavuze ko gahunda y’itorero muri za kaminuza ari uburyo bwo gufasha abanyeshuri bakagira ubumenyi bufite indangagaciro bityo bakazavamo abayobozi beza. Yabwiye abanyeshuri biga muri IPB ko baramutse bagize ubumenyi nta ndangagaciro bafite ibyo baba biga byababera impfabusa.

Ati “mu gihe cya Jenosode hari abanyabwenge bize kaminuza bishoye mu bikorwa bibi bakora Jenoside aba rero turi kubatoza indangagaciro na kirazira bityo ubutore bwabo bubafashe kurwanya ikibi cyose cyakongera gukurura umwuka mubi mu Banyarwanda”.

Umutahira mukuru Rucagu Boniface ageza gahunda y’itorero ku banyeshuri biga muri IPB.

Izina ry’ubutore ryahawe abanyeshuri biga mu ishuri rikuru rya IPB ubwo hatangizwaga itorero tariki 18/07/2014 ni INDEMEREZAMIHIGO.
Abanyeshuri biga muri iri shuri rikuru nabo bavuze ko guhabwa inyigisho z’itorero bibafasha kongera imbaraga zo kubaka igihugu cy’u Rwanda bimakaza amahoro.

Ngo inyigisho bahawe zizabafasha guhuza ubumenyi bafite n’ubutore kuko aribyo bizabafasha kubaka igihugu kirangwamo amahoro; nk’uko Turatsinze Munezero Yve umunyeshuri muri iyo kaminuza abivuga.
Kuri we ngo ubutore bivuze gukunda igihugu, ndetse bagaharanira inyungu z’Abanyarwanda muri rusange.

Bacinye akadiho.

Intore kandi ngo ni ishaka ibisubizo by’ibibazo adahutaje bagenzi be kubwe ngo yumva kwimakaza ubutore ari umusingi w’iterambere ry’igihugu.

Gahunda y’itorero igamije gutoza Abanyarwanda kwanga ikibi bagakunda icyiza ndetse bakubaka indangagaciro na kirazira bimakaza ubutore kuko igihugu kitagendera ku ndangagaciro na kirazira kiba cyasenyutse.

Ernestine Musanabera