Ubwo basuraga iri shuri kuwa 12/12/2013, aba basirikare biga muri Kenyan National Defense College baganirijwe ku mikorere y’ishuri ry’u Rwanda, Rwanda Defense Command And Staff College ndetse n’amateka yaryo, nyuma batemberezwa ibikorwa bitandukanye by’iri shuri, birimo ibyumba byo kwigira mo, icyumba cy’ibitabo, ibyumba bikorerwamo ibitabo n’amakarita n’ibindi.

Abanyakenya batungurwaga na bimwe mu bikorerwa mu ishuri Rwanda Defense Command And Staff College

Nyuma yo gusura ibi bikorwa, Brig Gen D.P. Okwaro ukomoka muri Kenya yavuze ko ishuri rikuru rya gisirikare rifite ibisabwa byose kugira ngo rihinduke ishuri ry’icyitegererezo, bityo ngo ku rwego rw’umuryango w’Afurika y’Uburasirazuba hashobora kuganirwa uburyo ryarushaho kongererwa imbaraga rikazaba ishuri ry’icyitegererezo mu karere u Rwanda ruherereyemo kose.

Ati: “Hano mufite ibyumba binini cyane byo kwigiramo, ibyumba byinshi byo kuraramo, ibyo gukorera imyitozo, ibikoresho bigezweho n’ibindi byinshi ariko abaryigiramo ni abantu bacye. Ndibwira ko nk’umuryango hari icyo twakora kugira ngo iki kigo gihinduke icyitegererezo mu karere kose.”

Abiga igisirikare muri Kenya bari mu Rwanda bashimye ko ishuri ry’u Rwanda rifite icyerecyezo cyiza.

Uwavuze ahagarariye ubuyobozi bw’ishuri rya Gisirikare rya Kenya, bwana Edwin Maloba, nawe yavuze ko ibyo baganirijwe ndetse n’ibyo beretswe byerekana ko iri shuri riri mu nzira nziza rihinduka ikigo cy’icyitegererezo mu karere ndetse no muri Afurika yose.

Yagize ati: “Nyuma y’ibiganiro mwaduhaye ndetse no kudutembereza muri izi nyubako zanyu nziza, navuga ko muri mu nzira nziza mugana ku ntego yanyu yo guhinduka ikigo cy’icyitegererezo.”

Nyuma yo gusura iri shuri, abagize iri tsinda basuye ishuri ry’Amahoro ryiswe Rwanda Peace academy, bakaba bishimiye uburyo iri shuri rikora, dore ko ritanga amasomo ku rwego mpuzamahanga, nk’uko byavuzwe n’umuyobozi waryo Col Jill Rutaremara.

Brig Gen D.P. Okwaro yashyikirije impano yo gushima umuyobozi w’ishuri ry’u Rwanda, Brig Gen Charles Karamba

Nk’uko byatangajwe ubwo batangiraga uru ruzinduko mu Rwanda, ngo bafite gahunda yo gusura ibigo bitandukanye nka Ministeri y’ingabo, Ikigo cy’imari cya gisirikare cya Zigama CSS, ahakorera ubwishingizi bwa MMI, ibigo n’amashuri bya gisirikare, sosiyete y’ubwubatsi ya Horizon, Ministeri y’ubucuruzi n’inganda ndetse bakanirebera inganda zitandukanye zikorera mu Rwanda.

Jean Noel Mugabo