Abafite ubumuga bwo kutumva no kutavuga bagira ikibazo cyo kubona serivisi nziza kubera ko ababakira batazi amarenga, kubaha serivisi bikagorana kuko rimwe na rimwe biba bimeze nko gushakisha.

Nkinzingabo Vincent, ukorera ku Kigo Nderabuzima cya Nyakinama aragira ati “Ntabwo byoroshye umuntu nk’uwo nguwo umeze nk’umwana kandi akuze atanabasha no kuvuga ariko tugerageza kubafasha uko dushoboye”.

Abatanga serivisi bari kwigishwa ururimi rw’amarenga ngo bajye babasha gutanga serivisi nziza kubafite ubumuga bwo kutumva no kutavuga.

Ngo kubera ikibazo cyo kutamenya amarenga hari igihe abafite ubumuga bahabwa serivisi batasabye, nk’uko Uwitonze Esron, ushinzwe abafite ubumuga mu Karere ka Musanze abisobanura.

Uwitonze ati “Noneho ko abantu batazi kuvugana nabo ugasanga babakoreye n’ibyo batabasabye ugasanga n’ikibazo gikomeye. Ariko na none ntiwanarenganya abo batanga serivisi kuko ntabwo urwo rurimo baba baruzi ngo babashe gukominika (kuvugana) na bo”.

Ururimi rw’amarenga rufasha mu guhanahana ubutumwa n’abantu batavuga ntibanumve.

Kwiga ururimi rw’amarenga bigira ingaruka nziza ku bafite ubumuga bwo kutumva no kutavuga kuko bava mu bwigunge bakabona abantu basabana nabo, bityo hakaba byinshi babigiraho.

Umubare w’abazi ururimi rw’amarenga uracyari muto cyane. Kugira ngo uzamuke ni inzira ndende igomba kugirwamo uruhare n’abafatanyabikorwa batandukanye; nk’uko Binama Theophile, ukorera Umuryango Nyarwanda w’Abafite ubumuga bwo kutumva no kutavuga (RNUD) abishimangira.

“Abantu bazi ururimi rw’amarenga baracyari bake cyane mu gihugu n’abatumva ntibavuge nabo baracyari bake. Ikintu cyakagombye gukorwa ni uko hakagombye kubaho ubufatanye n’inzego zitandukanye: inzego za Leta, iz’abikorera, imiryango itandukanye kugira ngo habe gukwirakwiza rwa rurimi rw’amarenga,” Binama.

Kutamenya ururimi rw’amarenga bituma hari igihe baha ufite ubumuga bwo kutumva no kutavuga serivisi adashaka.

Aya mahugurwa azamara iminsi itanu yateguwe n’Umuryango Nyarwanda w’Abafite ubumuga bwo kutumva no kutavuga ku bufatanye na VSO.

Nshimiyimana Léonard