Muri iyo nama yabaye tariki 01/11/2013, umuyobozi w’intara ya Kirundo yagaragaje ko icyari kigenderewe kwari ukubarura abanyamahanga batuye mu Burundi, ngo ariko bamwe mu nzengo z’ibanze babyumvise nabi babishyira mu bikorwa ukutari ko.

Ati « Birashoboka ko haba harabayemo udukosa, abakuru b’imitumba bakirukana abantu batabanje gushishoza bagatandukanya abashakanye, ariko nk’uko itegeko ry’Uburundi ribyemeza ko umunyamahanga ashakanye n’umugabo w’umurundi nawe afata ubwo bwenegihugu, abagore bagiye bagaruke mu ngo zabo, abandi nabo bagiye gushaka ibyangombwa, bamaze kubibona bazagaruke mu ngo zabo nk’uko dusanzwe tubanye neza».

Abanyarwanda birukanwe mu Burundi bibaruza ku mirenge binjiriyemo mu karere ka Gisagara.

Goverineri Munyantwi Alphonse, nyuma y’iyi nama yatangaje ko bagiye kurushaho gukomeza guhanahana amakuru kugira ngo babashe kujya bakumira ikibazo nk’icyo kitaraba, dore ko ngo n’ubusanzwe izi ntara zombi zisanzwe zibanye neza.

Ati « Imyanzuro yavuye muri iyi nama yadushimishije kuko impamvu aba Banyarwanda boherejwe twayumvise, tuzakomeza imigenderanire mu mahoro nta kibazo, abaje gushaka ibyangombwa bashatse bazasubira guturayo ubuzima bugakomeza, gusa icyangombwa ni uko abashaka gutura mu Burundi cyangwa mu Rwanda bakurikiza amategeko».

Iyi nama yafatiwemo imyanzuro ivuga ko Abanyarwanda batashye bose bazerekana ibyangombwa byemewe n’amategeko bagasubira gukomeza kuba mu Burundi.

Ikindi ngo ni uko abatandukanyijwe n’imiryango yabo kandi yarashakanye byemewe n’amategeko, ngo babifashijwemo n’inzego z’ubuyobozi bw’icyo gihugu bazasubizwa mu miryango yabo byihuse.

Ababanaga badasezeranye nabo ngo bazafashwa kubikora mu gihe bizaba byumvikanyweho n’abashakanye.

Clarisse Umuhire