Niyonsenga Leonidas ashinja Kabagwira Jeannette gukuramo inda y’amezi arindwi; aho yemeza ko yari yaramaze kubwira umugore we w’isezerano Nirere Beatrice ko yakoze ikosa ryo kumuca inyuma akanatera inda; bityo umugore we amwemerera ko azamufasha kurera umwana azabyara nk’uko Nirere abivuga.

Ahatukura ni ahabereye ikibazo

Agira ati “ Bwa mbere akimara kubimbwira nararakaye ariko ndamubabarira musaba ko azazana uwo mwana tukamurera kandi uwo mugore nta kintu yaburaga mu rugo rwacu”.

Niyonsenga Leonidas avuga ko akimara kumenya ko uyu mugore yakuyemo inda, yihutiye kumurega mu nzego z’ubuyobozi bw’Umudugudu na Polisi bityo Kabagwira Jeannette atabwa muri yombi.

Kabagwira Jeannette yemerera ubuyobozi ko ku wa kane w’icyumweru gishize ari bwo yanyweye imiti inda y’amezi 7 igahita ivamo.

Ati “ Uruhinja narujugunye mu muringoti ubundi ngo ndenzaho utwatsi”.

Gusa ariko kuri ubu umurambo warwo nturaboneka bikekwako imbwa zaba zarahise zirutwara.

Kabagwira Jeannette avuga ko hari umukecuru wamuhaye imiti bakumvikana amafaranga ibihumbi 70.

Ati “ Icyakora nahise mwishyura ibihumbi 40, andi aba ideni kuko nari kuzayamuha nyuma maze kuyabona”.

Abaturage banenga imyitwarire y’uyu mugore usanzwe afite abana bane, nabo atitaho bakananenga n’iy’uwamufashije kwihekura ugishakishwa.

Hagati aho Polisi yahise imujyana kwa muganga, kugira ngo harebwe niba nta kibazo kindi byamusigiye. Nyuma akazakurikiranwa ku cyaha akekwaho gukora.