Yavuze ko adashidikanya ko iyo nzu yubatswe kuri Yesu, “we buye rikomeza imfatiro zose, kandi ikaba igomba guhinduka ubuturo bw’Imana, Umwuka muziranenge; igomba kuba ikirango kigaragaza ubushobozi bw’Imana. Mu gihe rero dufungura iyi nzu nziza yubatswe mu cyubahiro cyayo, izabe impamvu yo gusakaza ubutumwa bwiza bw’Ubwami bwayo”.

Dr Ted Wilson n’itsinda ry’abandi bayobozi b’abadivantisti ku isi no muri Afurika, yaje mu Rwanda gutaha ibikorwa bitandukanye byubatswe n’iryo torero.

Dr Ted Wilson yakomeje agira ati “Iyi nzu ni nziza pe, ariko igomba kuba umunara ugaragaza icyubahiro cy’Imana mu mujyi wa Kigali, sinifuza ko abantu bazajya bayinyuraho bavuga ngo abadivantisti b’umunsi wa karindwi bafite amafaranga menshi, bubatse ibintu by’indashyikirwa, ahubwo bajye bavuga ngo dore abantu bakunda abandi, bita ku batishoboye, bakagaragaza imico mbonera ya Yesu Kristo”.

Umuyobozi w’abadivantisti ku isi yasabye ko icyicaro gikuru cy’Itorero ryabo mu Rwanda, ngo cyaba ahararikirwa abantu kwitegura kugaruka kwa Yesu Kristu no gutaha mu ijuru kw’abera.

Umuyobozi w’Abadivantisti hamwe n’Umuyobozi w’akarere ka Nyarugenge, batashye inzu y’icyicaro gikuru cy’itorero.

Imana ngo irashaka ko abanyarwanda bizera ko izabakorera ibikomeye nk’uko yabikoreye Abisiraheli igihe yabakuraga mu Misiri berekeza muri Kanani, igihugu cy’isezerano, nk’uko Dr Ted yabimenyesheje abaje kumwakira, ku mugoroba wo ku wa kabiri tariki 10/02/2015, aho yaje mu Rwanda avuye mu gihugu cya Sudani y’epfo kubasaba gushyira hamwe bakareka imvururu.

Inzu y’icyicaro cy’abadivantiste yatashwe hari umuyobozi w’Akarere ka Nyarugenge, Mukasonga Solange; washimiye abadivantisiti b’umunsi wa Karindwi n’andi matorero yose yubatse inyubako zijyanye n’igishushanyombonera cy’umujyi wa Kigali.

Inyubako y’icyicaro gikuru cy’abadivantisti b’umunsi wa karindwi yaraye itashywe.

Iyo nzu y’amagorofa umunani yubatswe mu gihe cy’imyaka ibiri hakoreshejwe amafaranga y’u Rwanda asaga miliyari eshatu, ikaba iri ku buso bungana na metero kare ibihumbi bitatu, nk’uko byasobanuwe n’Umuyobozi w’Itorero ry’abadivantiste mu Rwanda, Pasiteri Byiringiro Rukundo Hesron; akaba yashimiye abagize uruhare mu kuyubaka bose.

Mu myaka 30 ishize Itorero ry’Abadivantisiti mu Rwanda rimaze ryigenga (aho mbere ryari rikomatanyijwe n’iryo mu Burundi), ngo rimaze kubaka ibikorwa bihesha abanyarwanda imibereho myiza, birimo amashuri guhera ku abanza kugeza kuri za kaminuza, ibitaro n’ibigo nderabuzima ndetse n’umuryango wa ADRA utabara abahuye n’ibyago.

Simon Kamuzinzi