Ambasaderi Eugene Richard Gasana yabwiye AFP kandi ko u Rwanda rwamaze no kuburira Kongo kuko ngo u Rwanda rufite ibimenyetso ko ari igisirikari cya Kongo cyirasa ibisasu ku Rwanda kandi ngo u Rwanda ruzi aho ibyo bisasu birasirwa, bityo ngo ntibizagora u Rwanda na busa kujya kubihagarikira aho bitererwa muri Kongo.

Ambasaderi Gasana yagize ati “[abayobozi ba Kongo] nibadahagarika mu maguru mashya gutera ibi bisasu ku butaka bw’u Rwanda tuzigirayo kubihagarika kandi tuzabikorana ubushishozi no kutajenjeka kuko tuzi neza n’aho ababitera baba bari.”

Iyi ntumwa y’u Rwanda muri LONI yabwiye AFP ko ubu butumwa u Rwanda rwamaze kubutanga ku bihugu 14 byose bigize akanama k’umuryango w’abibumbye gashinzwe amahoro ku isi, akanama n’u Rwanda rurimo kuva mu ntangiriro z’uyu mwaka wa 2013.

Ambasaderi Eugene Richard Gasana uhagarariye u Rwanda muri LONI.

Intambara iri kubera mu burasirazuba bwa Congo yongeye kugira ingaruka ku bice by’u Rwanda, [ikaba] imaze kugwamo Abanyarwanda babiri naho abandi batatu barakomereka biturutse ku bisasu byinshi bimaze kuraswa mu Rwanda biturutse mu mpande ingabo za Congo ziherereyemo.

Umwe mu bakozi ba LONI yatangarije AFP ko hagiye gukorwa iperereza ryimbitse hakamenyekana uko ibyo bisasu u Rwanda ruvuga byaguye mu Rwanda n’uruhare ingabo za Kongo zibifitemo.

Iyi ntambara hagati y’ingabo za Kongo n’umutwe wa M23 urwanya Kongo yongeye kubura nyuma y’uko ibiganiro byari bigamije kugarura amahoro biburiyemo mu murwa mukuru wa Uganda.

Umuyobozi w’ingabo za LONI ziri muri Kongo mu mutwe witwa MONUSCO yavuze ko bahangayikishijwe n’iryo yubura ry’imirwano, yemeza kandi ko MONUSCO iri gufasha FARDC kurwanya M23.

Amakuru yatangajwe na Radio Okapi ikorera muri Kongo yemezaga ko ingabo za FARDC zamaze gutsimbura iza M23 mu birindiro zari zifite ahitwa Kibumba.

Leta y’u Rwanda yatangaje ko kuva iyo mirwayo yakubura imaze kwakira abaturage ba Kongo bari hagati ya 2500 na 3000.

Ahishakiye Jean d’Amour