Ibyinshi mu bibazo byabarijwe mu Kagari ka Murambi byumvikanagamo izina n’uruhare rw’umuyobozi wako “Sebagabo Jimmy”, nko guteza cyamunara amasambu y’abaturage agambiriye inyungu ze, kurya ruswa ndetse no gukoresha inyandiko mpimbano akabikuza sheke y’ibihumbi 300 by’umuturage.

Bamwe mu baturage bashinja uyu muyobozi kurya ruswa n’uburiganya kandi ko bigoranye kugira ngo umuturage ayoboye agurishe umurima atagize icyo amuhaho ngo bitungane.

Abaturage bavuga ko umuyobozi w’akagari kabo arangwa na Ryswa kandi akarenganya abaturage agamije indonke ze.

Mu bavugiye mu ruhame, harimo babiri bahamije ko Sebagabo hamwe n’itsinda ry’abo bakoranaga mu buriganya, bitwaje inyito yo kwishyura imitungo imiryango yabo yangije muri jenoside, maze agateza cyamunara amasambu y’abaturage mu buryo bw’ubugome.

Umwe muri aba baturage witwa Uwimana Odette yabwiye Inteko y’abaturage n’abayobozi bari bayobowe na Guverineri w’Intara y’Iburasirazuba, Uwamariya Odette, ko mu mwaka wa 2012 yagurishije umwe mu mirima ye, kugira ngo yishyure imitungo umugabo we (ufunze) yangije muri jenoside kandi ngo bikaba byarakozwe; ariko ngo icyamutangaje kikanamubabaza ni uko uwo gitifu w’akagari yaje guteza cyamunara isambu yari asigaranye mu buriganya.

Undi muturage na we yagaragaje ko ubwo bifuzaga kugurisha isambu yabo iri muri aka kagari, Sebagabo yashatse kubashakira umuguzi (umukomisiyoneri) ku bwumvikane bw’uko hari kugurwa miliyoni 2, gitifu agakuramo imwe na bo bagasigarana indi ariko ngo baramwangira.

Abayobozi banyuranye bifatanyije n’Ab’i Rwamagana kumva ibibazo by’abaturage.

Nyuma ngo baje kubona umuguzi wigenderaga iyo sambu bayigurisha miliyoni 5 z’amafaranga y’u Rwanda.

Nyuma yo kumenya ko isambu yagurishijwe Sebagabo yagize umujinya maze yitwaza ko muri uwo muryango (w’abana benshi) harimo umuhungu (na we wubatse) wahamwe n’ibyaha bya jenoside ndetse yararyozwaga amafaranga y’u Rwanda ibihumbi 600 byo kwishyura imitungo, maze ngo ntiyita ku mitungo ye ahubwo atesha agaciro bwa bugure bw’isambu y’umuryango; ayiteza cyamunara kuri miliyoni 2.

Aha na ho ngo Gitifu yishyuye uwangirijwe imitungo amafaranga ye ibihumbi 600 ariko miliyoni n’ibihumbi 400 yasigaye ntiyayashyikiriza bene yo, kugeza ubwo biyambaje ubuyobozi bw’akarere ariko ntatange ubusobanuro bufatika, nk’uko byemejwe n’Umuyobozi wungirije w’Akarere ka Rwamagana, Yvonne Muhongayire, wari muri iyi gahunda.

Muhongayire yavugiye mu ruhame ko yasuzumye ikibazo cya Sebagabo agasanga atari shyashya.

Undi muryango wagaragaje ikibazo kuri Sebagabo ni uwagurishije umurima n’Itorero ADEPR kuri miliyoni 3, ariko ngo icyo gihe Sebagabo yabategetse gukora sheke ebyiri: imwe y’amafaranga 2,700,000 yafashwe n’umuryango ndetse n’indi ya 300,000 yatwaye ubwe. Cyakora zose ngo zari zanditseho umukecuru wa ba nyir’isambu.

Umwe mu bagize uwo muryango ngo yabonye ko ari akarengane ajya muri Banki ya Kigali guhagarikisha iyo sheke ku buryo gitifu atabashije kuyibikuza.

Uyu muyobozi w’akagari ngo ntiyashizwe ahubwo yigiriye ku cyicaro cya ADEPR i Kigali, akoresha amayeri bamuha indi sheke yanditseho amazina y’umukecuru nyir’isambu, maze afatanya n’umuhungu we witwa Ruhumuriza, barayibikuza.

Ubwo yasabwaga ibisobanuro na Guverineri w’Intara y’Iburasirazuba, uyu muyobozi w’akagari, hari aho yarahiye mu izina ry’Imana avuga ko atabizi ariko abaturage bahita bamukomera cyane, avuga ko bamuviriyeho inda imwe barongera bamuha urwamo mu ruhame.

Sebagabo ushinjwa n’abaturage uburiganya na Ruswa.

By’umwihariko ku kibazo cyo gukoresha inyandiko mpimbano ngo abikuze sheke, uyu muyobozi w’akagari yavuze ko gukora ubwo buriganya kwari ukwiyishyura umwenda yari aberewemo n’umwe mu bagize uwo muryango.

Ibisobanuro byatangwaga na Sebagabo ku makosa yashinjwaga n’abaturage ntibyigeze binyura ubuyobozi ndetse n’abaturage bari benshi ku kibuga cya Murambi bateraga hejuru bamwamagana, bavuga mu magambo yabo ko yabamaze, ndetse abenshi bakavuga ko batabona uko bose bagaragaza ingorane yabateje.

Guverineri w’Intara y’Iburasirazuba, Odette Uwamariya, wari wifatanyije n’ubuyobozi bw’Akarere ka Rwamagana mu gutangiza uku kwezi mu Kagari ka Murambi mu Murenge wa Muhazi anabafasha gukemura ibibazo, yavuze ko umuyobozi nk’uyu adakwiriye guhagarara imbere y’abaturage ngo abayobore kuko nta ndangagaciro z’ubuyobozi zimuranga.

Guverineri Uwamariya yasabye abayobozi guharanira imiyoborere myiza bimakaza serivise zinoze.

Guverineri Uwamariya, avuga ko ukwezi kw’imiyoborere myiza ari uburyo bumwe bwo kwegera abaturage kugira ngo abayobozi bumve ko babereyeho gufasha abaturage, kandi ngo abayobozi bitwara nabi nk’uw’Akagari ka Murambi, ntabwo bazihanganirwa.

Umuyobozi Mukuru ushinzwe ubushakashatsi n’isuzumamiyoborere mu Kigo cy’u Rwanda gishinzwe Imiyoborere (RGB), Usengumukiza Félicien, yasabye ko abayobozi n’abaturage baharanira itangwa rya serivise zinoze kuko ari ryo shingiro ry’imiyoborere myiza n’iterambere kandi bakamenya ko iyo serivise itagenze neza, bidindiza iterambere rusange.

Emmanuel Ntivuguruzwa