Mu byo bishimira ko bagezeho babikesha ubufatanye, harimo gucunga umutekano ku mipaka yombi, guhanahana amakuru, gufatanya kubona ibinyabiziga byibiwe mu gihugu kimwe bikajyanwa mu kindi, ndetse no guhererekanya abanyabyaha bakorera ibyaha mu gihugu kimwe bagahungira mu kindi.

Umuyobozi wa polisi y’u Rwanda n’uw’iy’u Burundi.

Ni no muri urwo rwego rwo guhererekanya abanyabyaha, iyi nama yabereye muri Hotel Boni Concilii i Huye, yabayemo igikorwa cy’uko polisi y’u Rwanda yashyikirije iy’u Burundi umuntu watorokanye ibyuma by’umuziki by’agaciro ka miliyoni cumi n’eshatu mu Burundi akabizana mu Rwanda.

Uyu muntu yafatiwe ino mu Rwanda kuwa 1/11/2013, bisabwe na polisi y’u Burundi kuwa 29/10/2013.

Abayobozi ba polisi mu Rwanda no mu Burundi mu nama muri Centre d’Accueil Boni Concilii i Huye.

Polisi y’u Burundi yanashimiye iy’u Rwanda kuba barabafashije mu gutoza abapolisi ubu bagiye gucungera umutekano mu gihugu cya Somaliya, ndetse no kuba u Rwanda rwarafashije mu gutoza “intwazangabo” mu ishuri rikuru rya gisirikare.

Bitewe n’uko ibyaha bijyanye n’ikoranabuhanga bigenda byiyongera, hamwe n’ibyo gucuruza abantu bavanwa mu bihugu bimwe bajya mu bindi, iby’iterabwoba , ibya magendu no gucuruza intwaro, polisi z’ibihugu byombi ziyemeje kugirira amahugurwa hamwe, kugira ngo bazabashe guhangana na byo.

Ibi bikoresho by’umuziki ni byo byafatiwe mu Rwanda bisabwe na polisi y’u Burundi.

Mu rwego rwo kunoza umubano, hazabaho guhura kw’abapolisi b’ibihugu byombi mu buryo bwa siporo n’imikino.

Inama nk’iyi iteganyijwe kuzajya iba kabiri mu mwaka. Iheruka na yo yabereye muri Boni Concilii i Huye muri Mutarama uyu mwaka, kandi itaha izabera mu Cibitoke mu Burundi muri Werurwe 2014.

Marie Claire Joyeuse