Uwo mupfumu w’imyaka 50 yakomokaga mu Kagari ka Mulinja ko mu Murenge wa Kigoma, naho umurwayi wamuhitanye, yavuriraga iwe aho atuye Murenge wa Kibirizi mu Karere ka Nyanza, akaba yari amaze igihe cy’ukwezi afashwe n’uburwayi bwo mu mutwe.

Nyirimanzi Anatole, Umunyamabanga Nshingwabikorwa w’Akagari ka Rwotso ko mu Murenge wa Kibirizi mu Karere ka Nyanza, ari na ho uwo mupfumu yaguye, yemeje ko urwo rupfu rwabaye mu mpera z’icyumweru gishize.

Akomeza avuga ko uwo mupfumu yageze muri urwo rugo akumvikana n’umugore w’uwo murwayi, ariko ngo ubwo yatangiraga kumuha imiti ya gakondo, umurwayi yahise ananirana.

Uwo mupfumu ngo yahise atangira kumuha iyo miti ku gahato, undi na we aho kuyinywa atangira kumukubita imigeri n’ibipfunsi mu nda.

Ati “Nyuma yaho uwo mupfumu akubiswe imigeri n’ibipfunsi mu nda kandi, hari abavuga ko yari yaje yanyoye inzoga, hashize umwanya muto ahita yitaba Imana akiri muri urwo rugo.”

Umurambo we wahise ujyanwa mu Bitaro bya Nyanza kugira ngo usuzumwe ndetse n’uwo murwayi wo mu mutwe ajyanwa muri ibyo bitaro kugira ngo ashobore kuvurwa.

Mu minsi mike ishize, Minisiteri y’Ubuzima yari iherutse gusaba ubuyobozi bw’uturere kuba buhagaritse ibikorwa by’ubuvuzi bwa gakondo aho bigiye biri kugira ngo bamwe muri bo babanze bashake ibyangombwa bibemerera gukora kubera akajagari kari muri bamwe mu bakora uwo mwuga bakavangira abandi.