Gihorobwa ni quartier nshya mu zigize umujyi wa Nyagatare, ikaba itunganyirizwa kubakwamo binajyanye no kuvugurura no kwagura uyu mujyi. Mu gikorwa cyo gutunganya imihanda ku burebure bwa kilometero eshanu harangirikiramo ibikorwa by’abaturage birimo n’imyaka cyane nk’ibigori n’amasaka.

Ba nyir’imyaka batangaza ko batunguwe no kubona imyaka ya bo irandurwa dore ko ngo yanaburaga igihe gito ngo isarurwe.

Umwe mu baturage batuye mu Gihorobwa, Clement Niyonshuti yagize ati “Ni agahoma munwa! Nagiye kubyuka nsanga imashini zanciriye mu murima w’ibigori zawugize intabire. Ubu turi kwibaza niba ubuyobozi aribwo bwahagarikiye iki gikorwa cyo kutwangiriza.”

Ubuyobozi bw’akarere ka Nyagatare butangaza ko byabaye ngombwa ko iyi mihanda itunganywa hakirimo iyi myaka kuruta gutegereza ko isarurwa bijyanye n’umwaka w’ingengo y’imari iki gikorwa cyari giteganyijwemo.

Icyakora hatitawe ku buryo bw’imihingirwe y’aha hantu abangirijwe imyaka bagomba kwishyurwa, nkuko byasobanuwe na Muganwa Stanley umuyobozi wungirije w’akarere ushinzwe ubukungu n’amajyambere rusange.

Ati “Iki gikorwa cyakozwe hagamijwe kugendera ku ngengo y’imari y’uyu mwaka kugirango iyi mihanda izakorwe hakiri kare. Ku bijyanye n’abangirijwe imyaka twabamenyesha ko twabaruye ibyangijwe byose bakaba bazishyurwa ingurane vuba.”

Ikindi atangaza ni uko ku bufatanye bw’akarere na Rwanda Housing Authority, iyi mihanda nimara gutunganywa bizongera agaciro k’ibibanza byo muri iyi quartier bikajyana no kunoza imiturire mu mujyi wa Nyagatare.

Ubuyobozi bw’akarere ka Nyagatare buvuga ko aha mu Gihorobwa biteganyijwe ko hazubakwa inzu za Leta zirimo ibiro by’akarere, icyicaro cya Police kimwe n’ibigo bitandukanye.

Dan Ngabonziza