Mu mwaka ushize uyu mubyeyi yavuze ko yatewe n’abantu bitwikira ijoro bakura inka ye amahembe barangije bazirikana n’imbwa. Ngo gutotezwa byarakomeje no muri uyu mwaka, abantu batera amabuye ku nzu no kujegeza inzugi byose bigamije kumutera ubwoba.

Ubwo iki kibazo cyahagurukije abasenateri cyagezwaga ku buyobozi bw’Akarere ka Musanze n’ubwa IBUKA bwagaragaje ko ibyo gutotezwa muri uyu mwaka butabizi, ngo ibyo babiheruka mu mwaka washize.

Hon. Senateri Bizimana Jean Damascene, Perezida wa Komisiyo y’Ububanyi n’Amahanga, ubutwererane n’umutekano yemeza ko ubuyobozi bukizi kuko kimaze imyaka itandatu ariko Nyiraneza akaba yacitse intege bitewe n’uko ubwo yabagezaho ko atotezwa nta muntu wafashwe.

Nyuma yo kugaragaza ko atotezwa, inzego z’ubuyobozi bw’ibanze iwe byahashyize irondo ariko iyo bahavuye gato ngo abo bantu baraza bakamutera ubwoba bajegeza inzugi n’amadirishya y’inzu ye.

Umuyobozi w’Akarere wungirije ushinzwe imibereho myiza y’abaturage mu Karere ka Musanze, Ndayambaje Vincent yavuze ko bafashe ingamba zo kumurindira umutekano ku buryo bw’umwihariko hashyirwaho irondo rihoraho.

Mu mwaka ushize mu karere ka Musanze, abacitse ku icumu babiri bo mu Murenge wa Kinigi na Nyange barishwe no kugeza ubu ababikoze ntibaramenyekana ngo babiryozwe.

Nshimiyimana Leonard