Bamwe mu bakozi baganiriye na Kigali Today bakiri mu kazi tudatangaza amazina ku bw’umutekano wabo bavuga ko bamaze hafi amezi ane badahembwa kandi hoteli ibona abakiriya ikinjiza amafaranga.

Hoteli FARAJA imaze igihe gito mu Mujyi wa Musanze abakozi bayo baratabaza bavuga ko bakora badahembwa.

Bavuga ko nyiri hoteli atita ku mibereho yabo we agashyira imbere kwishyura inguzanyo yafashe yubaka iyo hoteli.

Umwe mu bakozi, avuga akababaro ke, agira ati “ Ikibazo dufite niba turi integwa niba turi abaroko byaratuyobeye. Kumara amezi ane tudahembwa kandi bamwe tuba mu nzu z’ubukode wakwaka inguzanyo ntibayiguhe. Mba nkeneye guhembwa kandi kuko mba naratanze amaboko yanjye kandi turinjiza, sinzi niba dutanga umuganda.”

Mugenzi we yunzemo ati “Abakiriya baraza hoteli igakora ikinjiza nta kibazo, amafaranga hoteli yinjiza yigira ku ideni rya banki akihugira kuri credit ye ntarebe ku bakozi. Amezi atatu ashize tutishyura inzu, dukeneye kurya abagore bakeneye kurya, nta terambere!”

Baragaragaza ko kuba badahembwa bifite ingaruka ku mibereho yabo ya buri munsi n’imiryango yabo ibatezeho amaramuko. Hari abafite abanyeshuri barihirira none ngo babuze amafaranga y’ishuri bakaba batarakoze ibizamini.

Icyakora, guhembwa nabi si bishya muri iyo hoteli nk’uko bakomeza babitangaza, ngo na mbere hose hoteli yagiye ibahemba nabi kuko ukora amezi atatu ugahembwa ukwezi kumwe.

Bamwe bakuyemo akarenge, ayo bakoreye na n’ubu ntibarayabona

Rusingizandekwe Jean Paul na Ndagijimana Jean Damascene bakoze kuri Hoteli Faraja kugeza mu Ukuboza 2014 basezera ku kazi kubera uko guhembwa nabi ariko bagenda amafaranga yabo babarimo batayabahaye.

Rusingizandekwe avuga ko uwari umukoresha we, amurimo amafaranga agera ku bihumbi 150 by’amezi abiri n’iminsi y’ikiruhuko cy’umwaka naho mugenzi we avuga ko bamufite ibihumbi 115.

Uko ari babiri na mugenzi wabo basereye hamwe ngo nyiri hoteli abarimo ibihumbi 375 bagerageje kumwishyuza biba iby’ubusa. Ngo bandikira umugenzuzi ushinzwe umurimo ku karere atumiza nyiri hoteli inshuro ebyiri ngo yanga kwitaba.

Bashatse kumurega mu rukiko avoka abaca ibihumbi 500 basanga ari menshi none icyizere gisagaye ku buyobozi bw’akarere.

Ati “Kugeza ubu ntegereje icyo meya azambwira ariko nabwo nta gisubizo cyuzuye nzabona kuko aba avuga ngo azamuhamagara ngo icyo azamubwira nzakubwira.”

Africain Biraboneye, Umunyamabanga wungirije w’Impuzamahuriro y’Abakozi mu Rwanda (CESTRAR), avuga ko icyo kibazo batakizi, agasaba abo bakozi kukibashyikiriza kugira ngo barebe uko babafasha binyuze mu buhuza cyangwa mu mategeko kugira ngo babone amafaranga yabo.

Ubuyobozi bwa hoteli ngo byarabahembye

Umuyobozi wa Hoteli Faraja, Nsengiyumva Francois, wirinze gutangaza byinshi kuri icyo kibazo cyo kudahemba ku gihe, yavuze ko abakozi be yabahembye ariko ntasobanura igihe yabahereye amafaranga yabo.

Nsengiyumva abajijwe niba yarabahembye, mu mvugo ivanzemo n’igitwenge ariko yirinda kugira ibisobanuro byinshi arenzaho.

Nyuma yo kuvugana na nyiri hoteli twongeye kuvugana n’umwe mu bakozi b’iyo hoteli ashimangira ko kugeza n’ubu batarahembwa none ngo banyir’inzu bacumbitsemo arenda kubasohora mu nzu kuko na bo bamaze amezi atatu batishyura amafaranga y’ubukode.

NSHIMIYIMANA Leonard