Aba bacuruzi basabwe kwimuka mu maduka bakoreramo bitarenze ku wa 05 Ukuboza 2015 bakajya gushaka ahandi bakorera, kugira ngo muri Karitsiye Mateus mu mujyi rwagati, hatangire kubakwa imiturirwa.

Amazu abacuruzi bo muri Mateus basabwa kwimukamo, kugira ngo asimbuzwe imiturirwa ijyanye n’igishushanyo mbonera cy’Umujyi wa Kigali.

Nubwo babyakiriye, baravuga ko kwimuka mu gihe cyo gusoza umwaka bizabagiraho ingaruka z’igihombo, ndetse bamwe ngo ntibarabona aho bimukira.

Umwe mu bacuruzi b’inzoga yagize ati “Ntiturashaka aho kujya gukorera; turifuza ko nibura bareka uyu mwaka ukarangira kuko abakiriya bacu baboneka mu minsi mikuru”.

Umujyi wa Kigali

Benon Rukundo, ushinzwe ishyirwa mu bikorwa ry’igishushanyo mbonera, yatangarije Kigali Today ko iki kibazo abacuruzi batigeze bakigeza ku buyobozi bw’Umujyi wa Kigali mu buryo bw’inyandiko, kugira ngo hasuzumwe niba impamvu yacyo ifite ishingiro.

Inyubako nshya y’ubucuruzi, bamwe mu bari muri Mateus basabwa kwimukiramo.

Yagize ati “Hari amasezerano twagiranye na bo y’uko bagomba gutanga biriya bibanza bitarenze tariki eshanu z’ukwezi gutaha bikubakwa”.

Avuga ko amazu yo gukoreramo ahari menshi mu Mujyi wa Kigali, harimo irimo kubakwa na Sosiyete yitwa CHIC, inyubako iri hafi ya gare yitwa Down Town, ndetse n’umuturirwa mushya wa M Peace Plaza.

Umuturirwa wa M Peace Plaza na wo ngo urimo ibibanza byinshi abacuruzi bashobora kujya gukoreramo.

Ku ikubitiro ibibanza icumi birimo amazu ashaje muri Mateus, ngo bigomba kuba byabonetse bitarenze uyu mwaka, nk’uko ubuyobozi bw’Umujyi wa Kigali bubiteganya.

Simon Kamuzinzi