Gitimbanyi Christophe uyobora akagari ka Ruronde mu murenge wa Rusebeya mu karere ka Rutsiro avuga ko Jenoside yabaye ari umusore ufite imbaraga, akaba yarakinaga n’umukino wa karate.

Yize mu mashuri abanza ataramenya iby’amoko. Ngo yatangiye kubimenya ageze mu iseminari nto ya Nyundo, kuko yahageze agasanga amoko arimo mu buryo bugaragara, abantu bavuga bati “aba ni Abatutsi, aba ni Abahutu.”

Iwabo bari baturanye n’ingo eshatu z’Abatutsi, urugo rwabo rwa kane ni rwo rwari urw’Abahutu gusa.

Ubwo Jenoside yatangiraga mu 1994, yarabyutse kare agiye ku kazi aho yakoraga mu ruganda rutunganya kawa rwa Nkora asanga Umututsi bari baturanye witwa Gasatsi arimo kwota izuba, abaza Gitimbanyi niba yamenye ko indege ya Habyarimana bayihanuye, arikiriza amubwira ko yabimenye.

Ageze mu ruganda, umuyobozi wabo witwaga Musemakweli wahakoraga ariko atahavuka yamusabye guhisha umugore we kuko abaturage bashakaga kumwica bavuga ko ari Umututsi, abimufashamo umugore we abasha kurokoka.

Yerekeye ku ruganda aho bogerezaga kawa asanga abantu bari gutera amabuye umugabo bari baturanye, barabyirutse bakina, babanye neza, nta kibazo bari bafitanye, witwaga Reveliyani, akaba umuhungu wa Gasatsi, amuhamagara mu izina ati “Gitimbanyi ntabara baranyishe!”

Icyo gihe abashakaga kumwica ngo bari abasore bato bato, bagufi, mu gihe Gitimbanyi we yari umusore ufatika, arabirukankana bariruka, aramutwara amuhisha ahantu, igihe kigeze bamaze kugenda aramubwira ava aho yari yihishe yambuka ikiyaga cya Kivu, aragenda.

Gitimbanyi yarazamutse avuye ku ruganda rwa kawa ageze haruguru asanga umugore witwa Kayitesi wari umaze umunsi umwe cyangwa ibiri abyaye ari kumwe na murumuna we witwa Nyirabukara wari waje kumusura, na we aramubaza ati “uramarira iki?”

Abimubwiye yumva ubumuntu bumujemo, ajya mu rugo arambara, yari afite akuma bita mucako bakinisha karate, aragafata akambara mu ijosi, aramanuka ageze imbere gato ahura n’umututsikazi witwaga Emeliyana, aramubwira ngo yigire hirya yihishe kuko hari abicanyi bagiye kuhanyura, aramwumvira aragenda arihisha, na we abasha kurokoka.

Yaramanutse agera kwa wa mubyeyi Kayitesi wari umaze igihe gito abyaye aramufata amujyana ahantu munsi y’urutare, afata na wa mukobwa bari kumwe abahisha hamwe, Gitimbanyi abategeka kutagira umuntu ubahavana.

Yaje kujyana Kayitesi n’uruhinja yari afite ku mugabo witwa Hitayezu amuhishayo amutegeka kudasohoka mu nzu, noneho uruhinja rwe rwarira bakagira ngo ni urw’umugore wa Hitayezu kuko umugore we na we yari afite uruhinja babyariye rimwe.

Gitimbanyi yagarutse mu rugo iwabo ahagera hagati ya saa kumi n’ebyiri n’igice na saa moya z’umugoroba, asanga Abatutsi bose bari baturanye bahungiye iwabo mu rugo, abwira nyina ngo abahishe mu nzu kandi abandi bantu ntibamenye ko bahari.

Ati “bwagiye gucya abo bantu twamaze kubageza aho bagomba kurokokera, nta n’umwe wapfuye bose babashije kwambuka ikiyaga cya Kivu baragenda bagera muri Congo.”

Ingufu yari afite zamubashishije kurokora Abatutsi 19 muri Jenoside.

Kubera ko Gitimbanyi yari afite nyirasenge washatse umugabo mu Batutsi, ngo hari babyara be na bo baje bamuhungiraho arabarokora ntihagira n’umwe wicwa.

Gitimbanyi avuga ko Jenoside yaje kurangira, abaze asanga abantu bamunyuze mu maboko ari 19 kandi bose nta n’umwe wapfuye. Ngo hari abandi bahigwaga atari azi bahanahanaga amakuru bakahanyura, bakahihisha, nyuma akabafasha bakagenda.

Impamvu abantu bose bamusabaga kubatabara ngo ni ukubera ko yari umusore ufite imbaraga kurusha abandi. Ati “babonaga ko umuntu twaba turi kumwe nta wapfa kumufata ngo amuteme cyangwa agire ikindi amutwara.”

Gitimbanyi avuga ko kuva kera Ubunyarwanda ari bwo yahaga agaciro kuruta andi moko abantu bahaga agaciro. Ati “mu by’ukuri amaradiyo menshi arimo RTLM yirirwaga yigisha urwangano hagati y’abantu bo mu moko atandukanye, ariko jyewe nta gaciro nabihaga.”

Icyatumaga atabiha agaciro ngo ni uko yari yarize mu iseminari yigishwa n’Abatutsi, ari bo basoma misa, akabona ari abantu nk’abandi, akabona kubana na bo nta cyo byari bimutwaye.

Ati “gahunda ya “Ndi Umunyarwanda” tugomba kuyishimangira mu baturanyi, no mu bana bacu, no mu bantu bakuze, umuntu wese akarenga amoko, akiyumvamo ko ari umunyarwanda.”

Yifuza ko gahunda ya “Ndi Umunyarwanda” yakomeza kujya ivugwa mu nama n’ibindi biganiro kuko ngo byagira uruhare mu kumvisha abantu bari baranangiye imitima yabo cyangwa bari bagifite ibikomere ko Umunyarwanda ari kimwe n’undi, dore ko n’abashingiraga ku mateka abazungu bari baragoretse, ubu na bo batangiye kubona ko ari ibinyoma.

Malachie Hakizimana