Ibi Biziyaremye Gonzague, Visi Perezida wa FPR Inkotanyi muri aka Karere yabibasabye kuri iki cyumweru tariki 15/6/2014, ubwo yasozaga amahugurwa yari ahuje abanyamuryango b’abagore basaga 150, yaberaga i Gihinga mu murenge wa Gacurabwenge. Akaba yari agamije kubongerera ubumenyi no gusangira ibitekerezo kuri politiki y’iterambere.

Visi Perezida wa FPR Inkotanyi mu karere ka Kamonyi atanga ikiganiro.

Mu kiganiro yatanze kiganisha ku mikorere mpinduramatwara mu Muryango FPR Inkotanyi, Bizimana yavuze ko umugore ashoboye. Yagize ati “agaciro mwahawe na FPR mugomba kukabyaza umusaruro, mukiteza imbere, mukarushaho kugirira umuryango nyarwanda akamaro”.

Uwamahoro Prisca, Umunyamabanga w’Umuryango FPR Inkotanyi mu Karere ka Kamonyi, we yibukije aba bagore ko ari imbaraga z’igihugu kandi ko bafite uruhare rukomeye mu guteza imbere umuryango nyarwanda; maze abasaba kurangwa n’indangagaciro zibereye umunyarwandakazi.

Yagize ati “mubibe amahoro iwanyu, mugire umuco kandi mube koko imbarutso y’iterambere rirambye bityo mwigirire akamaro mukagirire n’igihugu cyabibarutse”.

Abitabiriye ibiganiro batanze ibitekerezo.

Abitabiriye ibi biganiro baturutse mu Mirenge igize aka Karere uko ari 12 bishimiye ibyo bamaze kugeraho, bakesha imiyoborere myiza irangajwe imbere na FPR Inkotanyi.

Aba bagore biyemeje kugira uruhare mu iterambere ry’igihugu no gufasha Intore z’Umuryango bahagarariye kugira imyumvire ijyanye n’icyerekezo cy’igihugu ndetse no gufata neza ibimaze kugerwaho.

Marie Josee Uwiringira