Ingabo na Polisi b’igihugu bemeza ko barimo kubahiriza ku buryo bw’umwihariko insanganyamatsiko ya UN y’uyu mwaka igira iti: “Abashinzwe kubungabunga amahoro ba UN tumenye guhangana n’ibibazo by’amahoro make ku isi by’iki gihe, duharanira kurengera ubuzima bwa benshi bashoboka”.

Kubungabunga amahoro muri iki gihe ngo bigaragara ko bitoroshye, bitewe n’ingamba nshya abayahungabanya bashyiraho, ku buryo kubarwanya nabyo bisaba ingamba n’imyitozo bihanitse.

U Rwanda rurahamya ko abagabo n’abagore bari mu Gisirikare n’Igipolisi bahesheje Igihugu icyubahiro, kubera ubumenyi buhanitse mu kubungabunga amahoro, ubwitange hamwe n’ubutwari.

Umugaba mukuru w’ingabo z’u Rwanda aganira n’abasirikare b’u Rwanda bavuye mu butumwa bw’amahoro.

“Duhaye icyubahiro abasirikare n’abapolisi bacu, bakomeje kuba intangarugero mu murimo bakorana disipulini (discipline), aho barinda abantu bakanatwerera umusanzu mu kubateza imbere, rimwe na rimwe bakemera guhara ubuzima bwabo”, nk’uko Brig.Gen. Joseph Nzabamwita, Umuvugizi w’Igisirikare cy’u Rwanda yatangaje.

Yavuze ko u Rwanda rwibuka by’umwihariko abasirikare n’abapolisi baguye mu butumwa bw’amahoro i Darfur na Haiti, barimo Sgt-Maj. Jackson Muhanguzi, Sgt. Jean Claude Tubanambazi, Sgt. Ally Hassan Bisangwa, Pte. Innocent Muhayimana n’Umupolisi mukuru witwaga Spt. Camarade Rukabu.

U Rwanda ruza ku mwanya wa gatandatu ku isi mu gutanga abasirikare n’abapolisi benshi bajya mu butumwa bw’amahoro bwa UN, aho rufite abasirikare barenga 4000 mu mahanga, abapolisi 400 barimo abagore 150, hamwe n’abasirikare b’indorerezi z’amahoro 13 mu bihugu bya Sudani y’Epfo, Sudan, Haiti, Liberia, Guinea-Bissau na Cote d’Ivoire.
U Rwanda none nicyo gihugu cyabaye icya mbere ku isi mu gutanga abajya kubungabunga amahoro mu ntara ya Darfur ya Sudani, rukaba ruza ku mwanya wa kabiri ku isi mu kugira abagore benshi bajya mu butumwa bw’amahoro, ariko rukaza ku mwanya wa mbere muri Afurika.

Ingabo z’u Rwanda zishimirwa disipuline zigaragaza mu kazi ko kurinda amahoro mu bihugu bitandukanye.

U Rwanda ni igihugu cyohereza abantu bacyo aho rukomeye kurusha ahandi ku isi, nk’uko itangazo rya Ministeri y’ingabo ribigaragaza ko bitari byoroshye ku batumwe na UN mu ntara ya Darfur bitwa UNAMID, bayobowe n’Umunyarwanda Lt. Gen. Patrick Nyamvumba ukomeje kugirirwa icyizere, kuko kuri ubu amaze gutorerwa kuyobora uyu mutwe inshuro eshatu.

Uretse guharanira ituze ry’aho bagiye mu butumwa bw’amahoro, Ingabo na Polisi b’u Rwanda bafite umwihariko wo gushobora guhumuriza abagore n’abakobwa baba barahohotewe, bitewe n’uko bagenda ari abagore n’abagabo; kandi bagatanga ibisubizo ku bibazo by’imibereho y’abaturage basanze mu bihugu byabo.

Bimwe mu byo bafashije abaturage babana nabo harimo gutangiza ibikorwa by’iterambere rusange nk’umuganda, babubakira amashyiga ya rondereza (muri Darfur cyane ko bafite n’ikibazo cy’ibicanwa), ndetse n’ibikorwaremezo birimo amashuri, amasoko n’imihanda.

Simon Kamuzinzi