Kimwe mu bibazo bikomereye benshi mu batuye mu murenge wa Gahini ni icyo kutagira amazi, nk’uko bakunze kubigaragariza ubuyobozi bw’ako karere mu bihe bitandukanye.

Abaturage ngo bajya kuvoma amazi ku isoko ya Nyabombe bibavunnye cyane.

Abawutuyemo bavuga ko imibereho ya bo atari mibi muri rusange, ariko ikibazo cy’ingutu kuri bo ngo ni icy’amazi, nk’uko Kalisa Canisius abivuga.

Abatuye muri uwo murenge bavuga ko bafite isoko y’amazi yitwa Nyabombe ishobora guha amazi abatari bake. Gusa ngo iri kure ku buryo iyo bagiye kuyivomaho bisaba gukomata, abanyantege nke ntiborohere kubona amazi nk’uko Mboniragira Jean Baptiste abivuga.

Agira ati “Ubundi kugenda no kugaruka hatari inkomati biba ari nk’amasaha abiri ku igare, ariko kubera gukomata rwose uwagiyeyo mu gitondo agera mu rugo saa muunani.”

Uyu musaza yemeza ko abatuye igahini babayeho neza muri rusange ariko ikibazo cy’amazi ngo cyarabazengereje.

Hashize igihe kinini abatuye i Gahini bagaragaza ikibazo cyo kutagira amazi nka kimwe mu by’ibanze bidindiza iterambere n’imibereho myiza ya bo.

Umuyobozi wakarere ka Kayonza Mugabo John avuga ko ikibazo cyari gihari ari uko aho isoko ya Nyabombe iri hatageraga amashanyarazi yakoresha imashini isunika amazi ngo iyageze mu baturage, cyakora akanavuga ko ubuyobozi bw’ako karere bwamaze gusinyana amasezerano n’ikigo cya REG kugira ngo kiyageze kuri iyo soko.

Amashanyarazi n’ahagera ngo bizoroha kugeza amazi ku baturage nk’uko umuyobozi w’akarere yakomeje abisobanura, ati “REG yarangije kutubarira miliyoni 137 tarangije no gusinyanna amasezerano kugira ngo bageze amashanyarazi Nyabombe, baraza gutangira kuyajyanayo muri iyi minsi.”

Amazi y’isoko ya Nyabombe azakemura ikibazo cy’amazi by’umwihariko ku baturage bo mu tugari twa Juru na Kahi mu murenge wa Gahini, ariko biteganyijwe ko ayo mazi ashobora kuzagera no ku baturage b’indi mirenge ihana imbibe n’uwa Gahini.

Cyprien M. Ngendahimana