Minisitiri w’abakozi ba Leta n’Umurimo, Judith Uwizeye yatangarije abanyamakuru, ku wa mbere tariki 27 MAta 2015 ko ibi bikubiye muri zimwe muri gahunda leta yashyizeho zirimo no guha urubyiruko amahirwe yo kwiga amasomo y’ubumenyingiro kugira ngo bihangire umurimo.

Yagize ati “Leta y’u Rwanda yashyize ingufu mu kwiga ubumenyingiro ngo urubyiruko rwihangire imirimo. Mu banyenshuri barangije, 2% Leta ibaha akazi abandi bajya mu bigo by’abikorera, ariyo mpamvu Leta ishishikariza kwiga imyuga.”

Minisitiri Uwizeye yasobanuye ko iyi gahunda yagiyeho mu rwego rwo kurwanya ikibazo cy’ubushomeri, kuko igice kinini kitabona akazi abandi ugasanga bagiye mu buhinzi cyangwa ubworozi.

Muri iki kiganiro, Minisitiri Uwizeye yatangaje ko umunsi ngarukamwaka w’abakozi uzizihizwa tariki 1 Gicurasi 2015, uzizihizwa mu bigo abakozi bakoreramo, aho abakozi n’abakoresha bazakora ubusabane bakaganira ku kunoza umurimo.

Mbere yaho ariko, ku wa kabiri tariki 28 Mata 2015 hazaba umunsi mpuzamahanga wo kuzirikana ubuzima n’umutekano mu kazi, abakoresha bagasabwa kwita ku mibereho y’abakozi babo ku kazi.

Minisiti Uwizeye yanahishuye ko leta iri kwiga uburyo abakozi bayo bahabwa amazu aciriritse, ariko avuga ko iyi gahunda ikigwaho itaranozwa neza.

Emmanuel N. Hitimana