Uretse amakimbirane mu miryango ahoraho mu batarashyingiranye bwemewe n’amategeko, binadindiza imirere y’abana bavuka muri iyo miryango.

Jean Sauver Kalisa, umunyamabanga nshingwabikorwa w’uyu murenge, yemeza ko ibibazo bikomeye bituruka ku bakibana batarasezeranye bikigaragara muri uwo murenge, harimo n’imanza z’urudaca n’ubuhabara ku bagabo, biyemeje kubirangiza.

Yagize ati: “Icyo kibazo twifuje kugica burundu aho twabaruye imiryango igeze muri 225 ibana mu buryo budakurikije amategeko. Uyu munsi twaje muri aka kagali kuko twatashye akagali (ibiro) ka Kibare.

Turacyafite kimwe cya kabiri kindi tugomba kuzashyingiranya kandi tugenda tubasobanurira bakabyumva. Iyi ni intangiriro twatangiye uyu munsi.”

Bamwe mu bashyingiranyijwe byemewe n’amategeko, bemeje ko guhera ubu hagati yabo havuyemo urwicyekwe kuko n’ubwo bizeranaga bose kataburagamo, nk’uko byatangajwe na Jean de Dieu Uwizeyimana wasezeranye na Seraphine Kankundiye.

Ati: “Twari tumaranye umwaka umwe n’iminsi 22. Impamvu twahisemo gusezerana imbere y’amategeko ni uko iyo abantu batarasezerana ntago baba bizeranye bihagije ariko iyo bamaze gusezerana imbere y’amategeko bizerana bihagije ntihagire uwongera kwishisha undi.”

Kankundiye ati: “Ikiza cyabyo ni uko iyo mutarasezerana imbere y’amategeko umwe aba avuga ati ubu anyirukanye najya hehe ariko iyo mumaze gusezerana biba bibaye byiza kurushaho.”

Umurenge wa Gikomero waboneyeho no gutaha ibiro by’akagali ka Kibare, kubatswe mu mafaranga yavuye mu baturage. Aka kagali kanagejejweho televiziyo yo kujya ifasha abaturage kumenya amakuru no kureba ibibera mu gihugu cyabo.

Umurenge wanamuritse bimwe mu bikorwa wafashijemo abagore mu rwego rwo kwiteza imbere, birimo ubworozi bw’ingurube n’ubuhinzi bw’indabo bya kijyambere.

Emmanuel N. Hitimana