Iri huriro ngarukamwaka ryabaye ku mugoroba wo kuri uyu wa 10 Ukuboza 2015 ryari kumwe n’umuryango w’Umukuru w’Igihugu baganira ku nsanganyamatsiko igira iti "What do you stand for? Twagenekereza ngo "Uraharanira iki?"

Perezida Kagame yibukije urubyiruko ko kubakira igihugu ku by’abanyamahanga bashaka aho kucyubakira ku byo Abanyarwanda ubwabo bashaka bitaba ari byiza.

Perezida Kagame yavuze ko ibihugu byateye imbere bihora bisuzugura ibikiri mu nzira y’amajyambere, ku buryo ngo nta cyiza babivugaho, ndetse ko nta n’ubundi butabazi byatanga; ashingiye ku kuba ngo byaratereranye u Rwanda.

Yagize ati "Bahora badutezeho ibibi gusa nka Jenoside n’ibindi. Icyiza rero ni uko tutategereza uzaza kudutabara turi mu kaga, ahubwo ni uko twahitamo kwirinda kukajyamo."

Perezida Kagame yahereyeho asaba urubyiruko kumva ko iki atari igihe cyo gutakaza ubuyobozi bw’igihugu bafite.

Ati "Abaturage bagomba kwihitiramo inzira ya nyayo bumvikanyeho, kuko demokarasi iri mu murongo w’ibyo amahanga yifuza itari iyo abenegihugu bifuza, yaba atari nziza".

Madame Jeannette Kagame aganiriza urubyiruko rw’impuguke rw’Umuryango w’Imbuto Foundation abereye umuyobozi.

Madamu Jeannette Kagame, we yavuze ko insanganyamatsiko "What do you stand for?", ishyira mu kibazo urubyiruko kugira ngo rwiyumvemo inshingano yo guhindura abandi mu buryo batekereza ku bijyanye na politiki n’imico by’amahanga.

Yagize ati "Nimusigasire umuco w’iwanyu, murebe ibyiza byawo ndetse munahindure isura y’umugabane wanyu. Iwanyu mugomba kugira uruhare mu guhindura umuryango (nyarwanda) wanyu ari wo wacu".

Junior Sabena Mutabazi, umwe mu bari muri iryo Huriro, na we yasabye urubyiruko gukangura baganzi babo agira ati "Hari ibura ry’amakuru ku rubyiruko rwinshi muri iki gihe, nyamara hari bagenzi babo bagakwiriye kuba bayabaha".

Urwo rubyiruko ruhugutse, rwaba uruturutse mu Rwanda no mu mahanga, rwaganiriye n’umuryango w’Umukuru w’Igihugu ku ngingo zitandukanye zirebana na politiki, ubukungu, imiyoborere n’imibereho y’abaturage.

Andi mafoto

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2481 )