Sembagare atangaza ibi mu gihe muri ako karere hakunze kugaragara amakimbirane mu miryango rimwe na rimwe akavamo kwica cyangwa gukomeretsa, nyamara ba nyir’ukubikora bahamya ko bamenye Imana n’umwana wayo, Yezu (Yesu) Kirisitu.

Tariki ya 02 Mata 2015, umugabo utuye mu Murenge wa Cyanika, yarakaranyije n’umugore we kubera isindwe bigera aho aterura umupanga agiye gutema umugore we atema mu mutwe umwana yari ahetse ahita apfa nyina nawe arakomereka.

Tariki ya 12 Mata 2015 nabwo umugabo wo mu Murenge wa Kagogo yatonganye n’umugore we, agira umujinya ahita atwika inzu babamo irashya irakongoka, ku bw’amahirwe ntihagira umuntu uhiramo.

Sembagare asaba abanyamadini kwigisha abakirisitu babo bakareka amakimbirane yo mu miryango.

Izi ngero n’izindi zihagaragara, nizo umuyobozi w’Akarere ka Burera aheraho yibaza impamvu abantu badahinduka ngo bave mu kibi kandi bahora bigishwa n’abanyamadini gukora icyiza.

Agira ati “Pasiteri mwigishe abantu bahinduke! Ntabwo mbona guhinduka kw’abantu jyewe! Abantu kuki badahinduka? Baba bafite bibiliya, bazi no kuririmba! Bakanabyina baririmba ariko kuki bava mu kiliziya, yagera iwe agahinduka igisimba!”

Sembagare akomeza avuga ko guhinduka nta kindi bisaba uretse urukundo.

Agira ati “Inshuro 150 urukundo ruvugwa muri Bibiliya ariko reka da! Imitima y’abantu yaranangiye! Hazakorwa iki? Ariko kuko Imana ishobora byose izabidushoboza”.

Asaba abaturage bo mu Karere ka Burera guhinduka kuko badashobora gutera imbere bagifite “kwangana”, n’izindi ngeso mbi, mu mitima yabo, ngo ahubwo bakwiye kumera nk’uko Imana yabaremye kuko ntawe Imana yaremye nabi.

Umuyobozi w’Akarere ka Burera avuga kandi ko bateganya kugirana ibiganiro n’abanyamadini kugira ngo harebwe icyakorwa kugira ngo abantu bahinduke.

Abaturage bo mu Karere ka Burera bo bavuga ko amakimbirane akunze kugaragara iwabo akururwa n’ubusinzi butuka ku biyobyabwenge nka kanyanga.

NIYIZURUGERO Norbert